ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Ferǵanada Ibrayım Yusupov dóretiwshiligine baǵıshlanǵan ádebiy keshe ótkerildi

Ferǵana mámleketlik universitetinde Ózbekstan Qaharmanı, Ózbekstan hám Qaraqalpaqstan xalıq shayırı Ibrayım Yusupovtıń dóretiwshiligine baǵıshlanǵan «Kewildegi keń dúnya» atamasındaǵı ádebiy keshe hám ruwxıy-aǵartıwshılıq ilajları bolıp ótti.

Oǵan Ájiniyaz atındaǵı Nókis mámleketlik pedagogikalıq institutınıń bir topar professor-oqıtıwshıları hám studentleri de qatnastı.

Ferǵanalılar miymanlardı joqarı dárejede kútip alıp, universitette tigilgen qaraqalpaq qaraúyine mirát etti. Sońınan universitette Ibrayım Yusupovtıń ómiri hám dóretiwshiligine arnalǵan muzeydiń ashılıwı bolıp ótti.

Ádebiy kesheniń tiykarǵı bóliminde universitet rektorı B.Shermuhammadov, Qaraqalpaqstan xalıq jazıwshısı O.Ábdiraxmanov, universitet professorı S.Móminovlar sózge shıǵıp, qaraqalpaq hám ózbek xalıqlarınıń doslıǵı, awızbirshiligi, Ibrayım Yusupovtıń dóretiwshiligi haqqında bayanatlar jasadı.

Ilajda Ájiniyaz atındaǵı NMPI rektoratı tárepinen rektor B.Shermuhammadovqa doslıq hám húrmet belgisi sıpatında qaraqalpaq milliy kiyimi sawǵa etildi.

Sonday-aq, ilajda Ibrayım Yusupov shıǵarmaları tiykarında jaratılǵan saxna dóretpesi qoyıp berilip, ózbek hám qaraqalpaq tilinde qosıqlar jańladı. Student jaslar ayaq-oyınǵa tústi.

Konferenciyada shólkemlestiriwshiler tárepinen Ózbekstan hám Qaraqalpaqstan xalıq shayırı Ibrayım Yusupovtıń ruwxıy hám ádebiy miyrasın máńgilestiriw, onıń dóretiwshiligin student-jaslarǵa tereńnen úyretiw maqsetinde járiyalanǵan «El farzandi» atamasındaǵı qosıqlar tańlawında Ferǵana mámleketlik universiteti magistrantı Nargiza Bannopova 1-orındı iyelep, 1500000 sum menen sıylıqlanǵan bolsa, Ájiniyaz atındaǵı NMPI studenti Minara Sheripbaeva hám Ferǵana mámleketlik universiteti studenti Baxtiyar Xalimovlar 2-3-orınlardı iyelep dárejeli diplom, 1 mln hám 500 mıń sum muǵdarında aqshalay sıylıqlar menen sıylıqlandı.

Bunnan soń shayırdıń qosıqları, poemaları hám basqa da shıǵarmalarınan ibarat saxnalıq kórinisler, qosıqlardan úzindiler atqarılıp, mushayra keshesi shólkemlestirildi. Sonday-aq, I.Yusupov shıǵarmalarınan «Zakovat» intellektual oyını bolıp ótti. Keshe sońında usı ilajlarǵa belsene qatnasqan studentler xoshametlendi.

Ádebiy keshede instituttıń «Tumaris» qosıq hám ayaq-oyın xalıq ansambli aǵzaları, sonday-aq, Pedagogika fakulteti muzıkalıq tálim baǵdarınıń bir topar talantlı studentleri de óz ónerlerin kórsetip, ferǵanalılar tań qaldırdı.

NMPI baspasóz xızmeti.