Ájiniyaz atındaǵı Nókis mámleketlik pedagogikalıq institutı rektorı Bayrambay Otemuratov instituttıń bir topar belsendi studentleri menen ushırastı.
Ashıq sáwbetlesiw tárizinde ótken ushırasıw úsh yarım saattan aslam waqıt dawam etti.
Ilaj fakultetlerde oqıp atırǵan studentler tárepinen qolǵa kirgizilgen nátiyjeler, olardıń dóretiwshilik hám qol óneri úlgilerinen ibarat kórgizbe menen baslandı.
Ushırasıwda institut rektorı sońǵı jıllarda joqarı bilimlendiriwge, sonıń ishinde, pedagog kadrlar tayarlaytuǵın joqarı oqıw orınlarınıń jumısların hár tárepleme rawajlandırıw, bilimlendiriwdiń sapasın arttırıw, jaslardıń ilimiy-izertlew jumısların alıp barıwı hám oqıp, óz kónlikpelerin arttırıwı ushın jaratılıp atırǵan sharayatlar haqqında maǵlıwmatlar berdi.
Instituttıń eki mıń orınǵa mólsherlengen jańa oqıw imaratınıń qurılıs jumısları, sonday-aq, oqıw jılı basında paydalanıwǵa tapsırılǵan tórtinshi sanlı oqıw imaratı hám onıń qasındaǵı 90 orınlıq balalar baqshası, qurılısı dawam etip atırǵan sport sarayı, studentler turaq jayları, laboratoriyalar studentlerge bilim beriwdiń sapasın arttırıwǵa xızmet etetuǵınlıǵı atap ótildi.
Sonıń menen birge, bilimlendiriwdiń sapasın arttırıw baǵdarında ámelge asırılıp atırǵan jumıslar, aldaǵı maqsetler birgelikte dodalandı.
Atap aytqanda, institut qasınan texnikalıq bilimlendiriwge qánigelestirilgen mektep ashıw joybarı, studentlerdi sırt ellerdegi abıroylı joqarı oqıw orınları, ilimiy oraylarǵa jiberiw, olardıń baslamaların qollap¬-quwatlaw baǵdarında aldımızǵa qoyılǵan jobalar tuwralı maǵlıwmatlar berildi.
Óz gezeginde, studentler de bunday baslamalardan kelip shıǵıp studentlerdiń bilim hám kónlikpelerin, tájiriybesin arttırıw baǵdarında «4+2» sistemasınıń ámeliy áhmiyetin arttırıw, jaslardı jámlegen klublar, dógereklerdiń jumısların jetilistiriw, joqarı mamanlıqqa iye sırt elli professorlardı oqıw procesine shaqırıw hám usı sıyaqlı baǵdarlardaǵı usınısların bildirdi.
Ushırasıwdan soń studentler ózleriniń soranıwı menen instituttıń jańadan qurılıp atırǵan eki mıń orınlıq oqıw imaratınıń qurılıs jumısları menen tanıstı.
Solay etip, rektor Bayrambay Otemuratovtıń studentler menen ótkerilgen ashıq sáwbetlesiwi jaslardıń baslamaların qollap-quwatlaw hám olarǵa bolǵan itibar jáne ǵamqorlıqtıń jáne bir kórinisi boldı.
NMPI baspasóz xızmeti.