Búgingi kúnde mámleketimizde xalıq hám isbilermenlik subyektleriniń qayta tikleniwshi energiya dáreklerinen keń paydalanıwın mámleket tárepinen qollap-quwatlaw mexanizmlerin engiziw, usı dárekler arqalı elektr hám ıssılıq energiyası menen támiyinlew jáne hákimshilik-turmıslıq imaratlar hám obyektlerde energiya resurslarınan nátiyjeli paydalanıw boyınsha bir qatar unamlı jumıslar ámelge asırılmaqta.

Atap aytqanda, Ózbekstan Respublikası Prezidentiniń 2022-jıl 9-sentyabrdegi «Energiyanı únemlewshi texnologiyalardı engiziw hám kishi quwatlılıqqa iye qayta tikleniwshi energiya dáreklerin rawajlandırıw boyınsha qosımsha ilajlar haqqında»ǵı pármanı talapların orınlaw, sonday-aq, qayta tikleniwshi energiya dáreklerinen keń túrde paydalanıwdı mámleket tárepinen qollap-quwatlaw mexanizmlerin turmısqa engiziw maqsetinde Ájiniyaz atındaǵı Nɵkis mámleketlik pedagogikalıq institutınıń 600 orınǵa mɵlsherlengen studentler turaq jayı imaratı ushın respublikalıq tovar shiyki zat óndirislik birjası arqalı «NDKAB TEXAS» juwapkershiligi sheklengen jámiyeti menen 482 million 912 mıń sumǵa shártnama dúzilip, 20 dana ulıwma 4 tonnalıq quyash energiyasınan suw ısıtıw qurılmaları ornatıldı hám házirgi waqıtta iske túsirildi.

Sonday-aq, respublikalıq tovar shiyki zat óndirislik birjası arqalı 1 milliard 200 mıń sumǵa «SUN-HIGHTECH» juwapkershiligi sheklengen jámiyeti menen shártnama dúzilip, institut imaratlarına ornatıw ushın quwatlılıǵı 100 kVt bolǵan 1 komplekt energiya únemlewshi quyash panelleri stanciyası jáne de institut átirapların túngi jaqtılandırıw ushın 100 dana quyash jaqtılandırıw qurılmaları satıp alınıp, búgingi kúnde usı qurılmalardı ornatıw jumısları alıp barılmaqta.

NMPI baspasóz xızmeti.