Ájiniyaz atındaǵı Nókis mámleketlik pedagogikalıq institutında pitkeriwshi kurs studentleri menen birgelikte «Xalıqshıl mámleketlik puqaralıq xızmetke ashıq jol» atamasında oqıw seminarı bolıp ótti.

Ilajǵa Mámleketlik xızmetti rawajlandırıw agentligi Qaraqalpaqstan Respublikalıq filialı bas inspektorı N.Qutlımuratova, jetekshi inspektorı N.Allambergenov, fakultet dekanlarınıń orınbasarları, student-jaslar qatnastı.

Seminarda atap ótilgenindey, hár bir pitkeriwshi kurs studenti oqıwdı pitkergennen keyin qaysı tarawǵa jumısqa kiriw haqqındaǵı oylar hám jobalar menen júredi.

Mámleketlik puqaralıq xızmetke jumısqa kiriwde qaǵazbazlıq, insan faktorın túp-tiykarınan kemeytiw, bos jumıs orınları haqqında onlayn maǵlıwmat alıw maqsetinde Mámleketlik xızmetti rawajlandırıw agentligi tárepinen vacancy.argos.uz portalı iske túsirilgen bolıp, hár bir puqaraǵa mámleketlik xızmetke kiriwde teńdey imkaniyatlar jaratadı.

Ótkerilgen oqıw seminarında student-jaslarǵa Mámleketlik xızmetti rawajlandırıw agentliginiń wazıypaları, vacancy.argos.uz portalınıń imkaniyatları hám qolaylıqları, paydalanıw tártibi, kásip tańlawda itibar qaratıw kerek bolǵan máseleler, tańlaw arqalı jumısqa kiriw tártibi, mámleketlik xızmetshilerge qoyılıp atırǵan talaplar boyınsha maǵlıwmatlar berildi.

NMPI baspasóz xızmeti.