ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Belgili mámleketlik ǵayratker, Ózbekstan Qaharmanı Musa Erniyazovtıń 75 jıllıǵına arnaldı

Ádiwli el aqsaqalı, belgili mámleketlik hám jámiyetlik ǵayratker, Ózbekstan Qaharmanı, birneshe jıllar dawamında Qaraqalpaqstan Respublikası Joqarǵı Keńesiniń Baslıǵı bolıp islegen Musa Erniyazovtıń 75 jıllıǵı múnásibeti menen Ájiniyaz atındaǵı Nókis mámleketlik pedagogikalıq institutında «Musa Erniyazov – jaslar qálbinde» atamasında eslew keshesi bolıp ótti.

Ilajǵa professor-oqıtıwshılar, tyutorlar hám studentler qatnastı.

Kesheni instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Musa Erniyazov derlik 50 jıllıq miynet jolı dawamında óziniń úlken basshılıq potencialı, bay bilim hám tájiriybesi, ruwxıy pazıyletleri, Watanımızǵa bolǵan sheksiz muhabbatı hám sadıqlıǵı menen haqılı túrde xalqımızdıń júrek tórinen tereń orın alǵan ullı insan edi.

Onıń tikkeley basshılıǵında Qaraqalpaqstan Respublikasın sociallıq-ekonomikalıq rawajlandırıw, Aralboyındaǵı ekologiyalıq jaǵdaydı jaqsılaw, xalıqtıń turmıs dárejesin arttırıw boyınsha úlken dóretiwshilik hám adabanlastırıw jumısları ámelge asırıldı.

Qaraqalpaq elinde sońǵı jıllarda júz bergen úlken ózgerisler Musa Erniyazovtıń atı hám ámeliy xızmeti menen tıǵız baylanıslı.

Ol qaraqalpaq eliniń haqıyqıy jetekshisi sıpatında bárqulla xalıqtıń dárti, táshiwishleri menen jasadı. Ásirese, kekse áwlad wákilleri, mehriyban apa-qarındaslarımız, áziz jaslarımızdıń turmıs hám miynet sharayatların jaqsılaw, olardıń múnásip keleshegin támiyinlew jolında shın mánisinde belsendilik kórsetip, shın júrekten xızmet etti.

Musa Erniyazovtıń mámleketimiz hám xalqımız aldındaǵı úlken xızmetleri ılayıqlı bahalandı. Ol «Mehnat shuhrati» hám «Fidokorona xizmatlari uchun» ordenleri, «Ózbekstan Respublikasına xızmet kórsetken qurılısshı» hám «Ózbekstan Qaharmanı» sıyaqlı joqarı dárejeli ataqlar menen sıylıqlanǵan edi.

Eslew keshesinde Baslawısh tálim fakulteti tyutorı S.Palwaniyazova, Súwretlew óneri hám texnologiyalıq tálim fakulteti dekanınıń orınbasarı A.Bazarbaev, Túrkiy tiller fakulteti stajyor-oqıtıwshısı, shayır A.Dármenov, sonday-aq, studentler sózge shıǵıp, Musa Erniyazovtıń ómiri, miynet jolı, kópshilik tarawlar sıyaqlı bilimlendiriwdi rawajlandırıwǵa qosqan úlesi haqqında maǵlıwmatlar berdi.

Ózbekstan Qaharmanı Musa Erniyazovtı eslew kesheleri institut kóleminde ótkerilmekte.

NMPI baspasóz xızmeti.