ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Belgili shayır Xojamurat Turımbetovtıń 100 jıllıǵına arnalǵan ádebiy keshe bolıp ótti

Ájiniyaz atındaǵı Nókis mámleketlik pedagogikalıq institutında Qaraqalpaqstan Jazıwshılar awqamı menen birgelikte belgili shayır, Ózbekstan hám Qaraqalpaqstan Jazıwshılar awqamlarınıń aǵzası Xojamurat Turımbetovtıń tuwılǵanına 100 jıl tolıwı múnásibeti menen «Jawınger shayır» atamasındaǵı ádebiy keshe bolıp ótti.

Keshege Qaraqalpaqstan Jazıwshılar awqamınıń baslıǵı, Ózbekstan xalıq jazıwshısı, Qaraqalpaqstan xalıq shayırı Keńesbay Kárimov, belgili shayır Jumaniyaz Óteniyazov, Túrkiy tiller fakulteti jámááti hám professor-oqıtıwshıları, sonday-aq, studentler qatnastı.

Ádebiy kesheni instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.

Shayır Xojamurat Turımbetov 1922-jılı Taxtakópir rayonı aymaǵında dúnyaǵa kelgen. 1941-jılı Xojelidegi pedagogikalıq oqıw ornın pitkergennen soń ózi tuwılǵan aymaqta atqarıw komitetinde jumıs isledi.

Shayırdıń ómiri kútilmegen burılıslarǵa, oǵada qıyan-kesti waqıyalarǵa tolı boldı. Ol áyne jaslıq jigeriniń tolıp-tasqan shaǵında 1942-jılı Ekinshi jer júzilik urısqa atlandı. Stalingrad sawashında qatnasıp, mártlik kórsetti. Urıstan soń Shımbaydaǵı muǵallimler institutın pitkerip shıǵıp, rayonda muǵallim, rayonlıq gazetanıń redaktorı bolıp isledi. Sońınan Moskvadaǵı Ádebiyat institutın pitkerip, Jazıwshılar awqamında másláhátshi, juwaplı xatker, «Ámiwdárya» jurnalınıń bólim baslıǵı bolıp jumıs isledi.

Shayırdıń dáslepki qosıqları ótken ásirdiń 40-jıllarında járiyalana basladı. Onıń «Gúlistan», «Baxıtlı jaslıq», «Eki dos», «Baxıtlı qız», «Kóp kúttirgen báhár», «Tuwısqanlıq sálemi», «Talwas», «Máńgige tiri», «Jáne báhár keldi», «Shayır jolı» sıyaqlı poeziyalıq toplamları, sonıń menen birge, «Tań» povesti baspadan shıqtı. 1974-jılı shayırdıń «Tańlamalı shıǵarmaları» baspa júzin kórdi. Onıń qosıqları, poemaları ózbek, qazaq hám rus tillerine awdarıldı.

Xojamurat Turımbetov 46 jasında ómirden kóz jumdı. Qısqa ómir súrgen bolıwına qaramastan shayırdan bizge shekem kóplegen ádebiy miyras qaldı. Onıń shıǵarmaları qaraqalpaq ádebiyatınıń rawajlanıwına úlken qostı.

Ol islegen miynetleri hám ádiwli xızmetleri ushın Qaraqalpaqstan Respublikası Joqarǵı Keńesiniń Húrmet jarlıǵı menen sıylıqlandı.

Ádebiy keshede filologiya ilimleriniń doktorı Sársenbay Qazaqbaev, filologiya ilimleri boyınsha filosofiya doktorı Qabıl Mámbetov, qaraqalpaq ádebiyatı kafedrasınıń stajyor-oqıtıwshısı Allayar Dármenov, Ibrayım Yusupov atındaǵı stipendiya iyesi Aynura Qalbaevalar shayırdıń ómiri hám dóretiwshiligi boyınsha bayanatlar jasadı.

Keshe sońında Túrkiy tiller fakulteti qaraqalpaq tili hám ádebiyatı tálim baǵdarı studentlerinen dúzilgen «Ziywar» ádebiy dógeregi aǵzaları tárepinen shayırdıń qosıqlarınan úzindiler atqarıldı.

NMPI baspasóz xızmeti.