ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPIde jıl juwmaǵına arnalǵan sıylıqlaw ilajı hám bayram koncerti bolıp ótti

Ájiniyaz atındaǵı Nókis mámleketlik pedagogikalıq institutında juwmaqlanıw aldında turǵan 2022-jıl dawamında oqıwda, jámiyetlik jumıslarda, sonday-aq, túrli salalarda óz belsendiligin kórsetip, joqarı nátiyjelerge erisken student-jaslardı sıylıqlaw saltanatı jáne bayram koncerti shólkemlestirildi.

Ilajda institut rektorı Bayrambay Otemuratov sózge shıǵıp, «Insan qádirin ulıǵlaw hám belsendi máhálle jılı» dep atama berilgen 2022-jılda ilim, bilimlendiriw, mádeniyat, kórkem óner, sport hám basqa da tarawlarda joqarı nátiyjelerge erisken jaslardı qutlıqlap, aldaǵı oqıw hám jumıslarında tabıslar tiledi.

Ilajda «Jıl studenti» tańlawında jeńimpaz hám sıylı orın iyelerdi alǵan studentler, sonday-aq, eń belsendi jaslar hár qıylı nominaciyalar boyınsha sıylıqlanıp, olarǵa institut rektoratı jáne kásiplik awqamı komiteti tárepinen tayarlanǵan húrmet jarlıqları, bayram sawǵaları tapsırıldı.

Sonıń menen birge, ilimiy konferenciyalar, seminarlar, pán olimpiadaları, hár qıylı tańlawlar, sport jarıslarında úlken nátiyjelerge erisip, elimiz bayraǵın kóklerde jelbiretip, institutımızdıń atın shıǵarıwǵa úles qosıp kiyatırǵan bir topar belsendi jaslar, óz jumısların shın júrekten islep, jaslar menen islesiwde úlgili jumıslardı atqarıp kiyatırǵan dekan orınbasarları, tyutorlar da xoshametlendi.

Bayram ilajında sıylıqlanǵan studentler sózge shıǵıp, ilim-bilim sırların tereń meńgerip, jámiyetimiz hám mámleketimizdiń rawajlanıwına úles qosıwǵa múnásip sharayatlardı jaratıp berip atırǵan institut jámáátine minnetdarshılıqların bildirdi.

Ilaj instituttıń «Tumaris» qosıq hám ayaq-oyın xalıq ansambli, sonday-aq, muzıkalıq tálim baǵdarınıń talantlı studentleri atqarıwındaǵı bayram koncerti menen dawam etti.

NMPI baspasóz xızmeti.