Ájiniyaz atındaǵı Nókis mámleketlik pedagogikalıq institutında «Qaraqalpaqstan Respublikasınıń Mámleketlik gimni haqqında»ǵı nızamınıń qabıl etilgenine 29 jıl tolıwına arnalǵan ushırasıw keshesi bolıp ótti.

Ótkerilgen ilaj, sonday-aq, instituttıń barlıq auditoriyalarında búgingi sabaqlar Mámleketlik gimnler atqarılıwı menen baslandı.

Ushırasıwda instituttıń muzıkalıq tálim kafedrasınıń baslıǵı Ayapbergen Allanov, usı kafedranıń oqıtıwshısı Jalǵasbay Qálmenov, Dene mádeniyatı fakulteti dekanınıń orınbasarı Ádilbay Seytbekovlar sózge shıǵıp, professor-oqıtıwshılar hám studentlerdi bayram menen qutlıqladı jáne 1993-jıl 24-dekabr kúni Qaraqalpaqstan Respublikası Joqarǵı Keńesiniń XIV sessiyasında qabıl etilgen respublikamız Mámleketlik gimniniń dóreliw tariyxı, búgingi kúndegi áhmiyeti haqqında keń túrde maǵlıwmatlar berdi.

Atap ótilgenindey, dúnyadaǵı hár qanday ǵárezsiz mámleket óziniń belgilerine, sonıń ishinde, Mámleketlik gimnine iye. Gimn haqqında sóz bolǵanda, dáslep onıń mánisine dıqqat awdarıw kerek boladı. «Gimn» sózi greksheden alınǵan bolıp, dástúriy xarakterdegi qosıqtı saltanatlı túrde atqarıw mánisin ańlatadı. Sol sebepli, bul atqarıwda xalıqtıń azatlıǵı, erkinligi jırlanǵan. Gimn aytılǵanda mámleketlerdiń bayraǵı jelbirep, xalıqtı tolqınlandıradı. Solay eken, mámleketlik belgiler – gerb, bayraq hám gimn xalıqtıń, mámlekettiń birligin, awırbirshiligin ańlatatuǵın simvollardıń biri bolıp tabıladı.

Sáne múnásibeti menen bayram ilajları instituttıń barlıq fakultetlerinde ótkerildi.

NMPI baspasóz xızmeti.