Ájiniyaz atındaǵı Nókis mámleketlik pedagogikalıq institutında tyutorlar tárepinen alıp barılıp atırǵan jumıslar, ushırasıp atırǵan mashqalalar hám olardıń sheshimlerine baǵıshlanǵan jıynalıs bolıp ótti.

Oǵan instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov, studentlerdi turaq jay menen támiyinlew jumısların muwapıqlastırıw bóliminiń baslıǵı Q.Sharipov hám bólim qánigeleri, fakultet dekanlarınıń orınbasarları, profilaktikalıq inspektorlar, sonday-aq, barlıq fakultetlerde jumıs islep atırǵan tyutorlar qatnastı.

Házirgi waqıtta institutta ulıwma 11 fakultette 61 tyutor jumıs islep atırǵan bolıp, olar tárepinen ámelge asırılǵan jumıslardıń nátiyjeliligin arttırıw áhmiyetli wazıypalardıń biri bolıp esaplanadı.

Ilajda tyutorlar tárepinen usı jıldıń sentyabr-dekabr aylarında ámelge asırılǵan jumıslarınıń monitoringi boyınsha prezentaciya islenip, orın alıp atırǵan ayırım mashqalalar hám olardıń sheshimleri kórsetip ótildi.

Atap aytqanda, studentlerdiń ijara tólemleri menen baylanıslı hújjetlerde, sonday-aq, basqa da jumıs procesinde jol qoyılǵan kemshilikleri anıqlanǵan jáne óz funkciyalıq wazıypalarına nemquraydılıq penen qatnasta bolǵan 10 tyutorǵa «sógis» intizamlı sharası qollanıldı. Tyutorlar arasında bir emes, birneshe márte kemshiliklerge jol qoyıp atırǵan tyutorlar bar ekenligi málim etilip, olar menen sáwbetlesiw alıp barıldı.

Sonıń menen birge, tyutorlardıń jumısları ijarada jasaytuǵın studentler menen ijara shártnamaların dúzdiriw, málimleme saatların óz waqtında sapalı etip ótiw, sonday-aq, belgilengen wazıypalardıń orınlanıwı sıyaqlı ólshemler tiykarında analizlenip, olardıń nátiyjeleri dodalandı.

Jıynalısta óz lawazımlıq wazıypaların shın júrekten, bar ıqlası hám kásiplik sheberligi, turmıslıq tájiriybesi, hújdanı menen atqarıp atırǵan tyutorlar bar ekenligi atap ótilip, hár tárepleme úlgi bolıp, belsendilik kórsetip kiyatırǵan bir topar tyutorlar, sonday-aq, bólim qánigeleri institut rektorınıń húrmet jarlıǵı menen sıylıqlandı.

Jıynalısta bunnan bılay tyutorlar jumıslarınıń nátiyjeliligin artırıw boyınsha tiyisli tapsırmalar berildi.

NMPI baspasóz xızmeti.