ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Jıl juwmaǵı: 2022-jıl NMPI turmısında úlken tabıslar hám nátiyjeler jılı boldı

Sońǵı jıllarda respublikamızda joqarı bilimlendiriw tarawın ámelge asırılıp atırǵan keń kólemli reformalardıń nátiyjesinde joqarı oqıw orınlarınıń sanı 2,5 esege kóbeyip, jaslardı joqarı bilimlendiriwge qamtıp alıw dárejesi aldınǵı 9 procentten 38 procentke kóterildi.

Búgingi kúnde Ájiniyaz atındaǵı Nókis mámleketlik pedagogikalıq institutında bakalavriat tálim baǵdarları hám magistratura qánigeliklerinde ulıwma 18 mıńǵa shamalas student-jaslar bilim almaqta. Olarǵa 28 ilim doktorı hám professor, 179 ilim kandidatı hám filosofiya doktorı jáne tájiriybeli professor-oqıtıwshılardan ibarat 600 ge shamalas pedagog xızmetkerler tálim-tárbiya berip kelmekte.

Oqıw procesindegi áhmiyetli jańalıqlar

Juwmaqlanıw aldında turǵan 2022-jıl respublikamız bilimlendiriw sistemasında 90 jılǵa shamalas tariyxına hám óziniń ajıralmas ornına iye bolǵan Ájiniyaz atındaǵı Nókis mámleketlik pedagogikalıq institutı turmısında úlken jańalıqlarǵa tolı jıl boldı.

Institutta bilimlendiriwdiń sapasın arttırıw, joqarı mamanlıqqa iye bolǵan pedagog kadrlar tayarlawday iygilikli maqsetlerge erisiw ushın eń aldı menen zamanagóy sharayatlarǵa iye bolǵan materiallıq texnikalıq bazanı jetilistiriwge tiykarǵı dıqqat qaratıldı.

Oqıw procesi haqqında sóz eter ekenbiz, tarawdaǵı úlken jańalıqlardıń biri sıpatında Prezidentimizdiń «Pedagogikalıq bilimlendiriwdiń sapasın arttırıw hám pedagog kadrlar tayarlaytuǵın joqarı bilimlendiriw mákemeleriniń jumısların bunnan bılay da rawajlandırıw ilajları» haqqındaǵı qararı tiykarında «4+2» sisteması tiykarında studentlerdiń oqıw hám ámeliyat jumıslarınıń birlestiriliwi bilimlendiriwdiń sapasın arttırıwǵa xızmet etip atırǵanlıǵın atap ótiwimiz kerek.

Nókis qalası, Nókis, Taqıyatas hám Xojeli rayonlarındaǵı mektepke shekemgi, ulıwma orta bilim beriw hám orta arnawlı bilimlendiriw orınları menen studentlerdiń qánigelik ámeliyatların jolǵa qoyıw maqsetinde eki tárepleme ulıwma 180 shártnama dúzilip, bul baǵdarda jumıslar alıp barılmaqta.

Bıyılǵı oqıw jılınan baslap Ózbekstan Respublikası Ministrler Kabinetiniń «Shet tillerin úyreniwdi jetilistiriw boyınsha qosımsha ilajlar haqqında»ǵı qararına muwapıq, instituttıń inglis tili hám ádebiyatı bakalavriat tálim baǵdarına oqıwǵa qabıllawda kiriw imtixanları shet tili páninen tıńlap túsiniw, oqıw, jazıw hám sóylew kompetenciyaların anıqlaw jáne bahalawǵa baǵdarlanǵan kásiplik (dóretiwshilik) imtixan ótkeriw jolǵa qoyıldı.

Ózbekstan Respublikası Prezidentiniń qararına muwapıq, 2022-2023-oqıw jılınan baslap mámleketlik joqarı oqıw orınlarında magistraturaǵa qabıllaw bir jılda eki márte – avgust hám yanvar aylarında shólkemlestiriliwi belgilenip, magistraturaǵa qabıllawda abiturienttiń bakalavriat diplom balınıń ortasha kórsetkishi hám shet tilin biliw dárejesi boyınsha tiyisli milliy yamasa xalıqaralıq sertifikat tiykarında ámelge asırılıwı belgilep qoyıldı.

Engizilgen bul jańalıqlar qánigeli pedagog kadrlardı tayarlawda anaǵurlım sapa kórsetkishlerin támiyinlewge tiykar boldı.

Sonıń menen birge, institutta 2022-2023-oqıw jılınan baslap dúnya júziniń abıroylı reyting shólkemleri tárepinen «TOP-300»lik joqarı oqıw orınları qatarına kirgizilgen Malayziyanıń Lincoln University College oqıw ornı menen mektepke shekemgi bilimlendiriw baǵdarı boyınsha qospa tálim baǵdarlaması jolǵa qoyıldı.

Ilimiy-izertlew jumısları hám grantlar

Jıl dawamında institutta 4 ilim doktorı (DSc) hám 35 filosofiya doktorı dissertaciya jumısların qorǵadı. Házirgi waqıtta instituttıń ilimiy potencialı 34,2 procentti quramaqta. Házirgi waqıtta institutta biologiya ilimleriniń kandidatı Alisher Ajiev tárepinen Aralboyı mashqalalarınıń ilimiy sheshimine baǵdarlanǵan ilimiy joybarlar milliy tańlawı sheńberinde ulıwma bahası 963 million sumlıq «Araldıń qurıǵan jerlerinde tábiyǵıy sharayatta hám introdukciyalanatuǵın Cenoglossum viridiflorum Pall.ex.Lehm. hám Malacocarpus crithmifolius (Retz) C.A. Meydiń agrotexnikasın islep shıǵıw» atamasındaǵı ámeliy joybarı ámelge asırılmaqta. Sonday-aq, institutta 2020-2022-jıllarǵa belgilengen AQSh mámleketlik departamentiniń studentlerge inglis tilin STEM baǵdarı tiykarında oqıtıw baǵdarlaması boyınsha English Access Microscholarship Programm – STEM grantı tiykarında 55 mıń AQSh dolları muǵdarında grant jumısları alıp barılmaqta.

Doktoranturaǵa oqıwǵa qabıllawda tiyisli shet tilin biliw dárejesi boyınsha milliy yamasa xalıqaralıq sertifikat bolıwı talabınıń engiziliwi tarawdaǵı úlken jańalıqlardıń biri boldı.

Institut doktorantı Zoya Sársenbaeva 2022-2023-oqıw jılında tayanısh doktorantlar (PhD) arasında ótkerilgen Ózbekstan Respublikası Prezidenti mámleketlik stipendiyası tańlawında jeńimpaz bolıp, Prezident stipendiatı bolıwǵa eristi.

Materiallıq-texnikalıq bazanı jetilistiriwge baǵdarlanǵan jumıslar

2022-jılda institut úlken qurılıslar maydanına aylandı. Jıl basında instituttıń byudjetten tıs qarjıları esabınan 3 milliard 855 million sumlıq rekonstrukciya jumısları alıp barılǵan 600 orınlıq studentler turaq jayı paydalanıwǵa tapsırıldı.

«Jańa Ózbekstannıń 2022-2026-jıllarǵa mólsherlengen rawajlanıw strategiyasın «Insan qádirin ulıǵlaw hám belsendi máhálle jılı»nda ámelge asırıwǵa baylanıslı mámleketlik baǵdarlama», sonıń menen birge, Ministrler Kabinetiniń «Respublikalıq joqarı bilimlendiriw mákemelerinde studentlerdi turaq jay menen qamtıp alıw dárejesin arttırıw ilajları haqqında»ǵı qararına muwapıq, mámleketlik-jeke menshik sheriklik tiykarında «Qumbız awıl» MPJ aymaǵınan 500 orınlıq, sonday-aq, Túrkiy tiller fakulteti qasınan 362 orınlıq studentler turaq jaylarınıń qurılıs jumısları qızǵın pátlerde baslap jiberildi.

Oqıw hám ilimiy-izertlew jumıslarınıń nátiyjeliligin arttırıw maqsetinde institut sport sarayı hám ilimiy-ámeliy laboratoriyasınıń qurılıs-rekonstrukciya jumısları dawam etip atırǵan bolsa, Mektepke shekemgi tálim fakulteti qasınan 90 orınǵa mólsherlengen balalar baqshasınıń qurılısı juwmaqlanıw aldında tur.

Sonday-aq, bıyıl instituttıń 4-sanlı oqıw imaratında rekonstrukciya jumısları alıp barılǵan bolsa, jańadan qurılıp atırǵan 2000 orınlıq hám rekonstrukciyalanıp atırǵan 5-sanlı oqıw imaratlarında jumıslar jedel pátlerde dawam etpekte.

Studentlerge jaratılǵan sharayatlar hám olardıń nátiyjeleri: «Bes baslama» sheńberinde

Jaslardıń oqıwı, óz ústinde islep, bilim hám kónlikpelerin arttırıp barıwı, bos waqıtların mazmunlı ótkeriwi ilimiy-pedagogikalıq, ruwxıy-aǵartıwshılıq baǵdarındaǵı jumıslarımızdıń tiykarın quraydı. Ásirese, studentler arasında Prezidentimiz tárepinen alǵa súrilgen bes áhmiyetli baslamanı keń túrde úgit-násiyatlaw jáne ǵalabalıǵına erisiw maqsetinde 53 túrdegi jańa sport inventarları, bir waqıttıń ózinde android hám Windows operaciyalıq sistemalarında jumıs isleytuǵın zamanagóy kompyuterler, laboratoriyalar ushın eń sońǵı markadaǵı mikroskoplar hám basqa da úskeneler, zamanagóy estrada, klassikalıq hám milliy muzıka ásbapları, eń áhmiyetlisi, insan ómiri dawamında oqıwı kerek bolǵan kórkem-ádebiy, ilimiy baǵdarlardaǵı 220 ǵa shamalas atamadaǵı 1500 den aslam kitaplar alıp kelindi.

Mádeniyat hám kórkem óner

Álbette, ámelge asırılǵan usınday jumıslardıń barlıǵı óz nátiyjesin berdi. Atap aytqanda, Prezidentimizdiń qararına muwapıq, instituttıń Pedagogika fakulteti muzıkalıq tálim baǵdarınıń studenti Erkinay Orınbaeva Zulfiya atındaǵı Mámleketlik sıylıqtıń, sonday-aq, usı tálim baǵdarınıń jáne bir studenti – Dáwranbek Endirbaev «Nihol» Mámleketlik sıylıǵınıń laureatları boldı.

Muzıkalıq tálim baǵdarınıń studenti Umida Tursınbaeva Rossiya Federaciyasınıń Rostov-na-Donu qalasında ótkerilgen «Pravilnoe pokolenie» II xalıqaralıq kópjanrlıq dóretiwshilik tańlawında «Vokal» nominaciyası boyınsha 1-orındı qolǵa kirgizdi.

Usı tálim baǵdarınıń studentleri Dámexan Chapaeva, Jasur Mırzabaev hám Gózzal Xafizovalar Tashkent qalasında bolıp ótken «Muanbar navolar» xalıqaralıq tańlawında dástúriy atqarıwshılıq hám akademiyalıq vokal baǵdarlarında qatnasıp, joqarı, birinshi hám úshinshi dárejeli diplomlar menen sıylıqlandı.

Súwretlew óneri hám injenerlik grafikası tálim baǵdarınıń studenti Nurlan Qalbaev Rossiya Federaciyasında ótkerilgen «ART EXCELLENCE AWARDS» xalıqaralıq tańlawında grafika hám jivopis baǵdarları boyınsha laureat boldı. Sonday-aq, texnologiyalıq tálim baǵdarınıń studenti, jas dizayner Mehriban Aytniyazova «Nawqıran Ózbekstan» tańlawınıń respublikalıq basqıshında «Eń saylandı milliy lipaslar kollekciyası» nominaciyası boyınsha jeńimpaz dep tabıldı.

Ilim-bilimlendiriw

Ózbekstandaǵı barlıq joqarı oqıw orınları studentleri arasında ótkerilgen «Jıl studenti» respublikalıq tańlawında «Jıldıń eń bilimli studenti» nominaciyası boyınsha Tábiyǵıy pánler fakulteti studenti Gúlbanu Álmenova sıylı 2-orındı iyeledi.

Ótken oqıw jılında instituttıń bilimli, ziyrek hám ilimiy-izertlew jumısları menen shuǵıllanıp kiyatırǵan 9 studenti Prezident hám ataqlı mámleketlik stipendiyalar tańlawlarında jeńimpaz dep tabılǵan bolsa, bıyılǵı oqıw jılında Prezident stipendiyası, Islam Kárimov, Nawayı, Tólepbergen Qayıpbergenov hám Ibrayım Yusupov atındaǵı mámleketlik stipeniyalar tańlawlarında instituttıń 11 studenti jeńimpazlar qatarınan orın aldı.

«Jaslar kúni» múnásibeti menen Qaraqalpaqstan Respublikası Joqarǵı Keńesiniń Baslıǵı menen ótkerilgen ushırasıwda ilim, bilimlendiriw, kórkem óner, mádeniyat, sport hám basqa da tarawlarda ayrıqsha jetiskenliklerge erisip kiyatırǵan jaslar arasında Allayar Dármenov, Dilbar Jumaniyazova, Periyzat Ayapbergenova, Gúlayım Erjanbaeva, Yusup Qurbaniyazov, Bahadır Quwatbaevlar «Úmit ushqını» kókirek nıshanı menen sıylıqlandı. Sonday-aq, ámelge asırılıp atırǵan reformalarda ayrıqsha belsendilik kórsetip kiyatırǵan doktorant, magistrant jáne studentlerden ibarat birneshe jaslarımızǵa Joqarǵı Keńes Baslıǵınıń minnetdarshılıq xatları saltanatlı túrde tapsırıldı.

Institutta studentler arasında voleybol, milliy gúres, futbol hám mini futbol boyınsha «Ministr kubogi», «Rektor kubogi» jarısları turaqlı ótkeriliwi menen birge, «Zakovat» intellektual turniri boyınsha da «Rektor kubogi» jarısların ótkeriw jolǵa qoyılǵan. Bunıń nátiyjesinde studentlerimiz aymaqlıq, respublikalıq, hátteki, xalıqaralıq dárejede ótkerilip atırǵan jarıslarda da úlken jetiskenliklerge erispekte.

Tariyx fakulteti studentleri usı jıldıń may ayında Belarussiya mámleketlik pedagogikalıq universitetinde ótkerilgen xalıqaralıq intellektual tańlawda dúnyanıń 151 joqarı oqıw orınları studentleri arasında sıylı 3-orındı iyelegeni institut tariyxındaǵı joqarı nátiyjelerdiń biri boldı.

Sport

Jıl dawamında studentlerimiz sport tarawında da birqansha jetiskenliklerdi qolǵa kirgizdi.

May ayında Buxara qalasında qol urısı boyınsha ótkerilgen jáhán chempionatında instituttıń Dene mádeniyatı fakulteti studenti Gúlayım Bekmuratova sıylı 3-orındı iyeledi.

Ellikqala pedagogika fakulteti studenti Bernura Qudaybergenova Tashkent qalasın karate-do boyınsha bolıp ótken Aziya chempionatında 1-orındı iyelep, kontinet chempionı degen ataqqa eristi.

Voleybol boyınsha institut student-qızları XXIX Ózbekstan chempionatı jáne XV superkubok jarıslarınıń jeńimpazı bolıp, absolyut chempion degen ataqqa erisken bolsa, sporttıń regbi-7 túri boyınsha student-qızlarımız «Studentler ligası» jarısınıń respublikalıq basqıshında sıylı 2-orındı iyeledi.

Túrkiya Respublikasınıń Konya qalasında bolıp ótken Islam tileklesligi oyınlarında sporttıń erkin gúres túri boyınsha jarıslarda qatnasqan instituttıń Dene mádeniyatı fakulteti Dilfuza Ayımbetova bronza medalın alıwǵa miyassar boldı.

Ózbekstan Professional futbol ligasınıń Birinshi ligasında joqarı nátiyjelerge erisip, Proliga jollamasına iye bolǵan respublikamızdıń «Aral» futbol klubı aǵzaları bolǵan instituttıń 7 studenti Qaraqalpaqstan Respublikası Joqarǵı Keńesiniń «Úmit ushqını» kókirek nıshanı menen sıylıqlanǵanı biz ushın úlken maqtanısh.

Sonday-aq, dekabr ayında Tashkent qalasında boks boyınsha eresekler arasında ótkerilgen Ózbekstan chempionatında Dene mádeniyatı fakulteti studenti Rashida Tagirova 1-orındı jeńip aldı.

Shet tilleri fakulteti rus tili hám ádebiyatı tálim baǵdarınıń studenti Gúlnura Seytjanova sporttıń qol urısı, Taekwondo WT, djiu-djitsu, ushu túrleri boyınsha ótkerilgen Ózbekstan chempionatlarında jeńimpaz boldı.

Bıyıl respublikalıq kólemde ótkerilgen «Bes baslama olimpiadası» jarıslarında da institut student-jasları úlken tabıslarǵa eristi. Atap aytqanda, qazaq tili hám ádebiyatı tálim baǵdarı studenti Aqmaral Sabırxanova shaxmat boyınsha jarısta 2-orın, texnologiyalıq tálim baǵdarınıń studenti Zulfiya Erekeeva jeńil atletika boyınsha jarısta sıylı 3-orındı, arnawlı pedagogika (logopediya) tálim baǵdarınıń studenti Sayyora Arzekeeva kibersport boyınsha jarısta sıylı 3-orındı iyeledi.

Xalıqaralıq birge islesiw jumıslarınıń nátiyjeleri

Búgingi kúnde Ájiniyaz atındaǵı Nókis mámleketlik pedagogikalıq institutında xalıqaralıq birge islesiw jumısları sheńberinde dúnyanıń abıroylı joqarı oqıw orınları, ilimiy-izertlew orayları menen 50 ge shamalas shártnama hám memorandumlar dúzilgen bolıp, sonıń ishinde, 20 ǵa shamalas joqarı oqıw ornı QS (Quacquarelli Symonds World University Ranks), THE (Times Higher Education) hám ARWU (The Academic Ranking of World Universities) sıyaqlı xalıqaralıq reyting shólkemleri tárepinen joqarı bahalanǵan joqarı bilimlendiriw mákemeleri bolıp esaplanadı.

Jıl dawamında usınday xalıqaralıq birge islesiw jumısların jetilistiriw hám jańa basqıshqa alıp shıǵıwǵa tiykarǵı dıqqat qaratıldı.

Institutta Koreya Respublikasınıń Ózbekstandaǵı ayrıqsha hám tolıq huqıqlı elshisi Kim Xi Sang, konsul Na Donggun, Ózbekstannıń Franciyadaǵı Elshixanası hám Franciya xalıqaralıq birge islesiw hám bilimlendiriw associaciyası (ASIE) tárepinen Franciyanıń aldınǵı joqarı oqıw orınları professorları menen ushırasıwlar shólkemlestirildi. Bul ushırasıwlarda sırt el joqarı bilimlendiriw mákemeleri hám ilimiy orayları menen baylanıslardı jolǵa qoyıw máseleleri dodalandı.

Usı jıldıń 26-27-oktyabr kúnleri Samarqand qalasında bolıp ótken Ózbekstan-Rossiya úshinshi bilimlendiriw forumı sheńberinde Ájiniyaz atındaǵı Nókis mámleketlik pedagogikalıq institutı hám Qazan federal universiteti, sonday-aq, Novosibirsk mámleketlik texnika universiteti arasında eki tárepleme birge islesiw boyınsha shártnamalar dúzilip, ilimiy-pedagogikalıq baǵdarda xalıqaralıq birge islesiw baylanısları bekkemlendi hám jańa basqıshqa kóterildi.

Oktyabr ayında institut professor-oqıtıwshıları hám basqarıw tarawınıń wákilleri Qazan federal universitetinde tájiriybe almasıw boyınsha ámeliyat jumısların alıp bardı.

Sonıń menen birge, institut professor-oqıtıwshılarınıń dúnyanıń «TOP-1000»lıǵına kirgen joqarı oqıw orınlarında doktoranturada oqıwı hám ilimiy dárejelerge iye bolıp qaytıwı ushın múnásip sharayatlar jaratılǵan bolıp, bunıń nátiyjesinde instituttıń matematikanı oqıtıw metodikası kafedrasınıń stajyor-oqıtıwshılarınan M.Jetpisbaevtıń Rossiya Federaciyasınıń S.L.Sobolyov atındaǵı matematika institutınıń jáne A.Qutbaevtıń Novosibirsk mámleketlik universitetiniń aspiranturasına qabıl etilip, oqıwǵa jiberilgenin atap ótiw kerek.

Ózbekstan Respublikası Innovaciyalıq rawajlanıw ministrligi jáne Ilimdi qarjılandırıw hám innovaciyalardı qollap-quwatlaw qorı tárepinen járiyalanǵan jas alımlardı ilimiy stajirovkalarǵa jiberiw boyınsha járiyalanǵan tańlawda instituttıń assistent-oqıtıwshısı T.Oteev Sileziya universitetine (Chexiya) hám instituttıń tayanısh doktorantı R.Arziev Moskva mámleketlik universitetlerine (Rossiya) ilimiy stajirovkalardı qolǵa kirgizip, tańlaw jeńimpazları boldı.

Xalıqaralıq birge islesiw boyınsha ámelge asırılıp atırǵan bunday jumıslar studentlerdiń oqıw procesinde de óz nátiyjesin berip kelmekte. Instituttıń pedagogika hám psixologiya tálim baǵdarınıń studenti Aysultan Sharafatdinova usı jıldıń yanvar-fevral aylarında ótkerilgen xalıqaralıq intellektual tańlawda jeńimpaz bolıp, Moskva avtomobil jolları mámleketlik texnika universitetiniń magistratura basqıshına waqtınan burın grant tiykarında oqıwǵa qabıl etilgen bolsa, inglis tili hám ádebiyatı tálim baǵdarınıń studenti Kórkem Jalǵasova Slovakiya milliy grantlar baǵdarlamasında jeńimpaz bolıp, Slovakiyadaǵı eń abıroylı joqarı oqıw orınlarınıń biri bolǵan Preshov universitetinde oqıwın dawam ettirmekte.

Professor-oqıtıwshılar hámiyshe húkimetimiz itibarında

Institut jámááti hám professor-oqıtıwshılarınıń pidayı miynetleri de húkimetimiz tárepinen bárqulla itibarǵa alınıp kelinbekte.

Ózbekstan Respublikası Ǵárezsizliginiń 31 jıllıǵı múnásibeti menen instituttıń Bilimlendiriw sapasın qadaǵalaw bólimi baslıǵı Ergash Asamatdinov «Qaraqalpaqstan Respublikasına miyneti sińgen jaslar ustazı» húrmetli ataǵı menen, jaslar máseleleri hám ruwxıy-aǵartıwshılıq isleri boyınsha birinshi prorektor Quvondiq Qodirov «Watan pidayısı» kókirek nıshanı menen sıylıqlandı.

Psixologiya kafedrasınıń docenti Aydın Dáwekeeva «Jıl hayalı» tańlawında «Jıldıń eń belsendi ilimpaz hayalı» nominaciyası boyınsha jeńimpaz bolǵan bolsa, «Biz – sportshı shańaraqpız!» súreni tiykarında ótkerilgen jarıstıń respublikalıq basqıshında instituttıń Dene mádeniyatı fakulteti aǵa oqıtıwshısı Rustam Haydarov hám onıń shańaraǵı 1-orındı iyeledi. Belgili túrkiytanıwshı alım Axmet Baytursın ulınıń 150 jıllıǵına arnalǵan xalıqaralıq konferenciyada instituttıń qazaq tili hám ádebiyatı kafedrasınıń baslıǵı Írıstı Quttımuratova «TURKSOY» shólkeminiń medalı menen sıylıqlandı.

Instituttıń rásmiy veb-saytı ǴMDAnıń 50 ge shamalas joqarı bilimlendiriw mákemeleri aǵza bolǵan Evraziya pedagogikalıq universitetleri associaciyası (EAPU) tárepinen ótkerilgen joqarı oqıw orınları hám qosımsha professional bilimlendiriw shólkemleri veb-saytlarınıń II Xalıqaralıq ashıq tańlawında «Joqarı oqıw ornınıń aymaqlıq jámiyetshilik penen baylanısların támiyinlegeni ushın» nominaciyasınıń jeńimpazı dep tabıldı.

Student-jaslardı sociallıq jaqtan qollap-quwatlaw

Jıl dawamında studentlerdi qollap-quwatlawǵa da ayrıqsha áhmiyet qaratıldı. Atap aytqanda, oqıwda, jámiyetlik jumıslarda ayrıqsha belsendilik kórsetken, institutta shólkemlestirilgen «Studentler keńesi»niń belsendi aǵzaları bolǵan studentlerge institut qarjıları esabınan bazalıq stipendiyanıń 50 procentine shekemgi muǵdarda ústeme stipendiyalar tólendi. Prezidentimizdiń qararına muwapıq, magistratura qánigeliklerinde oqıp atırǵan hayal-qızlardıń kontrakt tólemleri mámleketlik byudjet qarjıları esabınan, Jaslar isleri agentligi tárepinen «Jaslar dápteri»ne kirgizilgen instituttıń bakalavriat tálim baǵdarlarınıń 161 studentiniń kontrakt tóleminiń 50 procenti tólep berildi.

Ózbekstan Respublikası Ministrler Kabinetiniń «Ijara huqıqı tiykarında jasap atırǵan studentler tárepinen tólenetuǵın ijara tólemlerin qaplap beriw sistemasın engiziw ilajları haqqında»ǵı qararına muwapıq, 2022-jıldıń yanvar-iyun aylarında ijarada jasaytuǵın 1209 studentke hár aydaǵı ijara tólemleri ushın bazalıq esaplaw muǵdarınıń 50 procenti muǵdarında tólemler tólengen bolsa, sentyabr-dekabr aylarında bul kórsetkish 842 studentti quradı. Sonday-aq, sentyabr-oktyabr aylarında institutqa 1-kursqa qabıl etilgen 494 studenttiń ijara tóleminiń 50 procenti qaplap berildi.

Tayarlaǵan: Islam Matekov,
NMPI baspasóz xatkeri.