Ájiniyaz atındaǵı Nókis mámleketlik pedagogikalıq institutı rektorı Bayrambay Otemuratov Pedagogika fakulteti jámááti menen ushırasıw ótkerdi.

Ashıq sáwbetlesiw tárizinde ótkerilgen ushırasıwǵa fakultet dekanı, dekan orınbasarları, kafedralardıń baslıqları, professor-oqıtıwshılar hám tyutorlar qatnastı.

Házirgi waqıtta fakultet quramında muzıkalıq tálim, pedagogika, psixologiya kafedraları jumıs alıp barmaqta. Muzıkalıq tálim, pedagogika hám psixologiya, sonday-aq, mektep menedjmenti tálim baǵdarlarında oqıp atırǵan jaslarǵa ulıwma 70 ke shamalas professor-oqıtıwshılar bilim berip kelmekte.

Ilajda fakultette oqıw-tárbiya, ilimiy-pedagogikalıq jumıslarda orın alıp atırǵan mashqalalar, jol qoyılıp atırǵan kemshilikler sınǵa alındı.

Atap aytqanda, fakultettegi bakalavriat tálim baǵdarları hám magistratura qánigelikleriniń mámleketlik attestaciyadan ótiw kórsetkishi oǵada tómen bolıp, ushırasıwda bunıń anıq sheshimleri, sonday-aq, fakultette professor-oqıtıwshılar arasında sociallıq-ruwxıy ortalıqtı jaqsılaw baǵdarında ámelge asırılatuǵın jumıslar dodalandı.

Institut rektorı fakultet studentleri tárepinen qolǵa kirgizilip atırǵan tabıslar, nátiyjelerdiń joqarı ekenligin de aytıp ótip, bul kórsetkishlerdi bunnan bılay da jaqsılaw boyınsha usınısların bildirdi.

Sonıń menen birge, ushırasıwda fakultette aldınǵı oqıw jıllarında qabıllaw ámelge asırılǵan pedagogika hám psixologiya tálim baǵdarı bıyılǵı oqıw jılınan baslap pedagogika tálim baǵdarı bolıp ózgergenligi, usı tálim baǵdarın pitkerip shıqqan studentlerdi jumıs penen támiyinlew boyınsha keleshekte orın alıwı múmkin bolǵan mashqalalarǵa sheshim tabıw, sonday-aq, bul ózgeris psixologiya kafedrasınıń jumıslarına keri tásirin tiygizbewi ushın birgelikte ámelge asırılatuǵın jumıslar haqqında kafedra baslıqları jáne professor-oqıtıwshılardıń pikir-usınısların tıńladı.

Ushırasıwda bilimlendiriwdiń sapasın arttırıw, oqıw procesinde korrupciyalıq jaǵdaylardıń aldın alıw, ilimiy-izertlew jumıslarına studentlerdi keń túrde tartıw, pitkeriw qánigelik jumıslarınıń ilimiylik dárejesin jetilistiriw baǵdarında islenetuǵın ilajlar belgilep alındı.

NMPI baspasóz xızmeti.