Usı jıldıń 16-20-yanvar kúnleri aralıǵında Qashqadárya wálayatınıń Qarshı qalasında erler arasında gandbol boyınsha «Universiada-2022» sport jarıslarınıń respublikalıq final basqıshı bolıp ótti.

Oǵan aymaqlıq basqıshlarda jeńimpaz bolǵan tórt komanda – Qaraqalpaqstan Respublikası, Tashkent, Surxandárya hám Namangan wálayatlarındaǵı joqarı oqıw orınları studentlerinen dúzilgen saylandı komandalar qatnastı.

Qızǵın bellesiwler menen ótken jarısta respublikamız sportshıları Surxandárya wálayatı komandasın 34:29 esabında jeńip shıqqan bolsa, Namangan wálayatı komandası menen teń oyın kórsetti – 26:26. Tashkent wálayatı komandası menen ótkerilgen oyında jerleslerimiz azǵana parq penen – 32:34 esabında imkaniyattı berip qoydı.

Solay etip, gandbol boyınsha «Universiada-2022» sport jarıslarınıń respublikalıq final basqıshında 1-orındı Tashkent wálayatı, 2-orındı Qaraqalpaqstan Respublikası, al 3-orındı Namangan wálayatı saylandı komandaları iyeledi.

Respublikamız komandasınıń bunday nátiyjeni qolǵa kirgiziwinde saylandı komanda aǵzaları: Ózbekstan mámleketlik dene tárbiya hám sport universiteti Nókis filialınıń studentleri – J.Joldasbaev, K.Esemuratov, J.Biysenbaev, Qaraqalpaq mámleketlik universiteti studentleri – A.Ilyasov, M.Qulmuratov, M.Joldasbaev, A.Marqabaev, Nókis mámleketlik pedagogikalıq institutınıń studentleri – O.Xasamshaev, Sh.Sherniyazov, Q.Jarılqasınov, S.Turdımuratov, sonday-aq, sportshılardı jarısqa tayarlaǵan trener-oqıtıwshılar B.Pirniyazov hám A.Quralbaevlardıń miynetlerin ayrıqsha atap ótiw orınlı.

Solay etip, Qaraqalpaqstan Respublikası saylandı komandası «kishi olimpiada» esaplanǵan universiada sport jarıslarınıń respublikalıq final basqıshında gúmis medalın qolǵa kirgizdi.

Islam Matekov,
NMPI baspasóz xatkeri.