Búgin, 25-yanvar kúni Ájiniyaz atındaǵı Nókis mámleketlik pedagogikalıq institutında fakultet dekanlarınıń jaslar máseleleri hám ruwxıy-aǵartıwshılıq isleri boyınsha orınbasarları, profilaktikalıq inspektorlar, studentlerdi turaq jay menen támiyinlew jumısların muwapıqlastırıw bóliminiń juwapkerleri, tyutorlar, jaslar awqamı baslanǵısh shólkemi, sonday-aq, studentler keńesi jetekshileri qatnasıwında jıynalıs bolıp ótti.

Ilajda instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov oqıw-tárbiya jumıslarınıń nátiyjeliligin arttırıw boyınsha alda turǵan wazıypalarǵa keń túrde toqtalıp ótti.

Atap aytqanda, studentler menen tıǵız islesiw, olardıń baslamaları, pikir-usınısları hám múrájatların unamlı sheshiw, ijarada jasaytuǵın studentlerdiń halınan xabar alıp, ijara úylerindegi sharayatlardı úyreniw, baslanıw aldında turǵan juwmaqlawshı imtixanlar barısında hár qıylı dámegóylik, korrupciyalıq jaǵdaylardı boldırmaw, bunıń ushın ata-analar menen birge islesiwdiń nátiyjeliligin arttırıw, sonday-aq, student-jaslar arasında ótkeriletuǵın hár qıylı tańlawlar, sport jarısları, pán olimpiadaların úgit-násiyatlaw boyınsha anıq tapsırmalar berildi.

Jıynalısta usı baǵdarda islenetuǵın jumıslar belgilenip, wazıypalar bólistirildi.

NMPI baspasóz xızmeti.