Búgingi kúnde elimizde jaslardıń bilim alıwı, kásip-óner iyelewi, óz umtılısları hám baslamaların turmısqa engiziwi ushın barlıq sharayatlar jaratılmaqta. Usınday imkaniyatlardan nátiyjeli paydalanıp, joqarı nátiyjelerge erisip, teńleslerin izine ertip, úlgi bolıp atırǵan jaslar kópshilikti quraydı.

Degen menen, jaslar arasında zıyanlı illetlerge berilip ketiw, náshebentlik hám psixotrop zatlardan paydalanıw jaǵdaylarınıń baqlanıp atırǵanı da hesh kimge sır emes.

Ájiniyaz atındaǵı Nókis mámleketlik pedagogikalıq institutında ótkerilgen «Biz, jaslar náshebentlikke qarsımız!» atamasındaǵı ushırasıwda usınday illetlerge qarsı gúresiwde nelerge áhmiyet qaratıw zárúrligi haqqında pikir almasıldı.

Instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp barǵan ushırasıwǵa instituttıń Dene mádeniyatı fakulteti jámááti – professor-oqıtıwshılar, tyutorlar hám studentler, sonday-aq, densawlıqtı saqlaw tarawı qánigeleri qatnastı.

Ilajda Respublikalıq jas óspirimler dispanseriniń shıpakeri S.Sadıqova náshebentlik hám onıń unamsız aqıbetleri, insannıń densawlıǵı, sociallıq jaǵdayına bolǵan keri tásirleri haqqında prezentaciya tárizinde, turmıslıq mısallar menen túsindiriw jumısların alıp bardı.

Sonıń menen birge, ushırasıwda jaslar arasında nasıbay atıw, temeki ónimlerinen paydalanıw, spirtli ishimliklerge berilip ketiw, toksikomaniya, hár qıylı psixotrop zatlardan paydalanıw sıyaqlı illetlerdiń jiyi ushırasıp atırǵanlıǵı, bularǵa qarsı gúresiw ushın bárqulla sergeklikti joǵaltpastan, orınlarda bulardıń aqıbetleri haqqında úgit-násiyat jumıslarınıń alıp barılıwınıń áhmiyeti haqqında sóz boldı.

Ilajda studentler ózlerin qızıqtırǵan sorawlarǵa qánigeler tárepinen juwap aldı.

NMPI baspasóz xızmeti.