ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Hayal-qızlar zorlıqqa emes, qádirlewge, qorǵawǵa múnásip

Elimizde sońǵı jıllarda hayal-qızlardıń jámiyettegi rolin arttırıw, gender teńligi hám shańaraq máseleleri boyınsha respublikalıq komissiyası, Oliy Majlis Senatı janındaǵı Hayal-qızlar hám gender teńligi máseleleri komiteti, sonday-aq, Ózbekstan Respublikası Shańaraq hám hayal-qızlar mámleketlik komitetiniń shólkemlestiriliwi usı baǵdardaǵı alıp barılıp atırǵan jumıslardıń nátiyjeliligin sapalıq jaqtan jańa basqıshqa kóterdi. Bunnan bılay usı strukturalardıń jumısları nátiyjesinde nızamshılıqtı jetilistiriw menen birge barlıq tarawlarda hayal-qızlardı qollap-quwatlaw hám eń baslısı – zorlıqtan qorǵaw baǵdarında keń kólemli jumıslar ámelge asırılmaqta.

Ájiniyaz atındaǵı Nókis mámleketlik pedagogikalıq institutında ótkerilgen «Hayal-qızlar zorlıqqa emes, qádirlewge, qorǵawǵa múnásip» atamasındaǵı dógerek sáwbetinde usı máseleler haqqında sóz boldı.

Ilajǵa instituttıń Baslawısh tálim fakulteti tyutorları, student-qızları, sonday-aq, Nókis qalalıq Ishki isler uyımlarınıń jumısların muwapıqlastırıw basqarması hayal-qızlar máseleleri boyınsha aǵa inspektorı, podpolkovnik A.Namenova, Nókis qalalıq Shańaraq hám hayal-qızlar bólimi qánigesi Z.Elmuratova, institut rektorınıń hayal-qızlar máseleleri boyınsha másláhátshisi S.Bekchanova, hayal-qızlar profilaktikalıq inspektorı M.Narımbetovalar qatnastı.

Dógerek sáwbetinde atap ótilgenindey, elimizde shańaraqtaǵı zorlıqtıń aldın alıw sistemasın jetilistiriw boyınsha segiz normativlik-huqıqıy hújjet, yaǵnıy eki nızam, bir Prezident qararı hám bes húkimetlik qarar qabıl etildi.

Turmısta basım hám zorlıqtan jábir kórgen hayal-qızlarǵa mámleketlik qorǵaw kepillenetuǵın qorǵaw orderi, onıń beriliw shártleri, sonday-aq, ámeliy áhmiyeti haqqında tolıq maǵlıwmatlar berildi.

Sonıń menen birge, házirgi waqıtta mámleketimizde hayal-qızlardıń oqıwı, bilim alıwı, kásip-óner úyreniwi, ilimiy-izertlew jumısları yamasa isbilermenlik penen shuǵıllanıwı ushın barlıq sharayatlar jaratılıp atırǵanlıǵı, atap aytqanda, sociallıq járdemge mútáj shańaraqlardıń qızlarına joqarı oqıw orınlarına kiriw ushın mámleketlik grant tiykarında ayrıqsha kvotalardıń ajıratılıwı, magistratura qánigeliklerinde oqıp atırǵan hayal-qızlardıń kontrakt tólemleriniń mámleketlik byudjet qarjılarınan tolıq qaplap berilgenligi, hayal-qızlar arasında Zulfiya atındaǵı Mámleketlik sıylıq, «Mótabar ayol» kókirek nıshanı, hár qıylı baǵdardaǵı tańlawlar, pán olimpiadaları, sport jarıslarınıń turaqlı ótkerilip atırǵanlıǵı anıq mısallar menen atap ótildi.

Soǵan qaramastan, hayal-qızlar arasında jınayatshılıq, huqıqbuzarlıq háreketleriniń júz berip atırǵanlıǵı, ásirese, sońǵı jıllarda hayal-qızlar qatnasıwındaǵı urlıq, biyzarılıq sıyaqlı háreketlerdiń baqlanıp atırǵanlıǵı keleshegin oylaǵan hár qanday jámiyetti de tereń oyǵa salatuǵın jaǵdaylar bolıp esaplanadı.

Ilajda hayal-qızlar arasında usınday unamsız háreketler, zıyanlı illetlerdiń aldın alıw, zorlıq hám basım ótkeriw sıyaqlı jaǵdaylardan qorǵaw maqsetinde alda turǵan wazıypalar dodalanıp, pikir almasıldı.

NMPI baspasóz xızmeti.