Jaslıq insannıń jarqın keleshegi ushın tiykar jaratatuǵın qaytalanbas máwriti bolıp tabıladı. Jas waqtında usınday imkaniyatlardan nátiyjeli paydalanıp, óz potencialın arttırıp barǵan, jámiyette óz ornın tabıwǵa umtılǵan adamnıń keleshegi aydın boladı.

Degen menen, «Bes barmaq teń emes» degenindey, jaslar arasında bilip-bilmey jınayat kóshesine kirip qalıp atırǵanlar da az emes. Házirgi waqıtta jaslar arasında huqıqbuzarlıqlar hám jınayatshılıqtıń aldın alıw tiykarǵı wazıypalarımızdıń biri bolıp, bunıń ushın tek ǵana ata-ana emes, sonıń menen birge, máhálle, oqıw orınları hám birneshe mákeme-shólkemler de juwapker bolıp esaplanadı.

Ájiniyaz atındaǵı Nókis mámleketlik pedagogikalıq institutında «Biz, jaslar jınayatshılıq hám huqıqbuzarlıqlarǵa qarsımız!» atamasında ótkerilgen dógerek sáwbetinde joqarıdaǵı máseleler jóninde sóz boldı.

Ilajǵa instituttıń Súwretlew óneri hám texnologiyalıq tálim fakulteti professor-oqıtıwshıları, tyutorlar, studentler, sonday-aq, Qaraqalpaqstan Respublikası Ishki isler ministrligi Operativ izlew xızmeti kiberqáwipsizlik bóliminiń xızmetkeri, aǵa serjant M.Orazbaev, Terrorizmge qarsı gúresiw basqarması xızmetkeri, mayor N.Tóreshov, paytaxtımızdaǵı 21-kishi rayonı aymaǵınıń profilaktikalıq inspektorları I.Turǵanbaev, D.Bektursınov, instituttıń profilaktikalıq instpektorları B.Masharipov hám M.Narımbetovalar qatnastı.

Dógerek sáwbetin instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Ilajda atap ótilgenindey, mámleketimizde jaslar siyasatı áhmiyetli baǵdarlardıń biri bolıp, olardıń bilim alıwı, kásip-óner úyreniwi, jámiyette óz ornına iye bolıwı ushın jaratılıp atırǵan sharayatlar hám imkaniyatlarǵa qaramastan, sońǵı jıllarda jaslar qatnasıwındaǵı jınayat jáne hukıqbuzarlıqlardıń sezilerli artqanlıǵı tarawda profilaktikalıq jumıslardıń nátiyjeliligin bunnan bılay da arttırıwdı talap etpekte.

Ótken jıldıń ózinde respublikamızda bir ǵana terrorizm menen baylanıslı ulıwma 9 jınayat anıqlanǵan bolıp, olarda qatnasqan 12 adamnıń yarımı jaslar bolıp tabıladı. Maǵlıwmatlarǵa názer awdaratuǵın bolsaq, huqıqbuzarlıqlardı islep, hákimshilik jazaǵa tartılǵanlar arasında da basım kópshilik jaslardan ibarat. Sonıń menen birge, sońǵı jıllarda jaslardıń sociallıq tarmaqlardan nadurıs paydalanıwı aqıbetinde de túrli huqıqbuzarlıqlar, jınayatlar ámelge asırılmaqta.

Bunday unamsız jaǵdaylardıń aldın alıw, álbette, orınlarda túsindiriw, úgit-násiyat jumısları arqalı ámelge asırıladı.

Sózge shıqqanlar jaslardıń oqıw hám jámiyetlik orınlarda, ijara úylerinde júris-turıs, qarım-qatnas qaǵıydalarına qatań ámel etiwi, bir-biriniń hal-awhalınan xabardar bolıp, biypárwalıq etpewi kerekligin túsindirip ótti.

Dógerek sáwbetinde jaslar arasında jınayatshılıq hám huqıqbuzarlıqlardıń erte aldın alıw boyınsha birgelikte islenetuǵın jumıslar belgilep alındı.

NMPI baspasóz xızmeti.