Xabarıńız bar, usı jıldıń 1-fevral kúninen 1-mart kúnine shekemgi aralıqta respublikamız boylap jaslar arasında náshebentlik hám psixotrop zatlarǵa qarsı gúresiw aylıǵı dep járiyalanıp, orınlarda tiyisli taraw qánigeleri qatnasıwında úgit-násiyat ilajları, ushırasıwlar hám dógerek sáwbetleri shólkemlestirilmekte.

Usı ilajlar sheńberinde Ájiniyaz atındaǵı Nókis mámleketlik pedagogikalıq institutında «Biz, jaslar náshebentlikke qarsımız» uranı astında ótkerilgen ushırasıwda Respublikalıq narkologiya orayı shıpakeri D.Qurbanova, Qaraqalpaqstan Respublikası Ishki isler ministrligi Jınayat-izlew basqarması náshebentlikke qarsı gúresiw bólimi aǵa operativ wákili, mayor R.Qállibekov, paytaxtımızdaǵı Imam iyshan Muhammed jámáátlik meshiti imam orınbasarı A.Jolawshievler tárepinen usınday illetlerge qarsı gúresiwde nelerge áhmiyet qaratıw zárúrligi haqqında pikir almasıldı.

Instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp barǵan ushırasıwǵa fakultet dekanlarınıń orınbasarları, professor-oqıtıwshılar, tyutorlar, studentler, sonday-aq, institutta jaslar tárbiyası máselesine juwapker bolǵan barlıq qánigeler qatnastı.

Búgingi kúnde elimizde jaslardıń bilim alıwı, kásip-óner iyelewi, óz umtılısları hám baslamaların turmısqa engiziwi ushın barlıq sharayatlar jaratılmaqta. Usınday imkaniyatlardan nátiyjeli paydalanıp, joqarı nátiyjelerge erisip, teńleslerin izine ertip, úlgi bolıp atırǵan jaslar kópshilikti quraydı.

Degen menen, jaslar arasında zıyanlı illetlerge berilip ketiw, náshebentlik hám psixotrop zatlardan paydalanıw jaǵdaylarınıń baqlanıp atırǵanı da hesh kimge sır emes.

Ilajda sózge shıqqanlar náshebentlik hám onıń unamsız aqıbetleri, insannıń densawlıǵı, sociallıq jaǵdayına bolǵan keri tásirleri haqqında turmıslıq mısallar menen túsindiriw jumısların alıp bardı.

Sonıń menen birge, ushırasıwda jaslar arasında nasıbay atıw, temeki ónimlerinen paydalanıw, spirtli ishimliklerge berilip ketiw, toksikomaniya, hár qıylı psixotrop zatlardan paydalanıw sıyaqlı illetler, sonday-aq, qumar oyınlarına berilip ketiw sıyaqlı jaǵdaylar jiyi ushırasıp atırǵanlıǵı, bularǵa qarsı gúresiw ushın bárqulla sergeklikti joǵaltpastan, orınlarda bulardıń aqıbetleri haqqında úgit-násiyat jumıslarınıń alıp barılıwınıń áhmiyeti haqqında sóz boldı.

Ilaj dawamında studentler de sózge shıǵıp, bunday úgit-násiyat jumıslarınıń nátiyjeliligin arttırıw boyınsha pikir-usınısların bildirdi.

NMPI baspasóz xızmeti.