Rektor Bayrambay Otemuratov pitkeriwshi kurs studentleri menen ushırasıw ótkerdi
Ájiniyaz atındaǵı Nókis mámleketlik pedagogikalıq institutı rektorı Bayrambay Otemuratovtıń barlıq fakultetler kesiminde pitkeriwshi kurs studentleri menen ushırasıwları baslandı.
Búgin, 9-fevral kúni Baslawısh tálim hám Tariyx fakultetleri student-jasları menen bolǵan ushırasıwlar ashıq sáwbetlesiw tárizinde dawam etti.
2022-2023-oqıw jılında instituttı ulıwma 4300 ge shamalas jaslar, atap aytqanda, kúndizgi tálim baǵdarları boyınsha 2 746, sırtqı tálim baǵdarları boyınsha 601, ekinshi qánigelik boyınsha 289 hám magistratura qánigelikleri boyınsha 663 student hám magistr pitkerip shıǵıwı kútilmekte.
Ushırasıwlarda institut rektorı pitkeriw qánigelik jumısları hám mámleketlik attestaciya, pitkeriwshilerdiń bántligin támiyinlew, bilimlendiriw mákemelerinde zamanagóy bilimli kadrlar ushın qoyılıp atırǵan talaplar, shet tilleri hám basqa pánlerden milliy hám xalıqaralıq dárejede tán alınǵan sertifikatlarǵa iye bolıw ushın jaratılıp atırǵan imkaniyatlar haqqında maǵlıwmatlar berdi.
Pitkeriwshi studentler magistratura qánigeliklerine qabıllawdaǵı ózgerisler, oqıw procesindegi áhmiyetli wazıypalar, sırt ellerdegi joqarı oqıw orınları hám ilimiy oraylarda tájiriybe almasıw boyınsha ózlerin qızıqtırǵan sorawlarǵa juwaplar aldı hám pikir-usınısların bildirdi.
Rektordıń pitkeriwshi kurs studentleri menen ushırasıwları barlıq fakultetler kesiminde dawam etedi.
NMPI baspasóz xızmeti.