ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Jaslar menen islesiw boyınsha orınlanǵan jumıslar hám aldaǵı wazıypalar dodalandı

Ájiniyaz atındaǵı Nókis mámleketlik pedagogikalıq institutında jaslar tálim-tárbiyası máseleleri boyınsha juwapker wákiller qatnasıwında májilis bolıp ótti.

Jaslar máseleleri hám ruwxıy-aǵartıwshılıq isleri boyınsha birinshi prorektor Q.Qodirov basshılıǵında ótkerilgen ilajǵa fakultet dekanlarınıń orınbasarları, institut profilaktikalıq inspektorları, studentlerdi turaq jay menen támiyinlew jumısların muwapıqlastırıw bóliminiń juwapkerleri, tyutorlar, pedagog-tárbiyashılar, jaslar awqamı baslanǵısh shólkemi jetekshisi hám institut psixologı qatnastı.

Májiliste studentler turaq jayında jaslar ushın jaratılǵan sharayatlar, olardıń bos waqıtların nátiyjeli shólkemlestiriw baǵdarında ámelge asırılıp atırǵan jumıslar, ijarada jasaytuǵın studentlerdiń halınan xabar alıw, gaz hám jılıtıw úskeneleriniń texnikalıq qáwipsizlik qaǵıydaları tiykarında paydalanıw, ijara tólemleri boyınsha shártnamaların tayarlaw jumıslarınıń barısı dodalandı.

Búgingi kúnde instituttıń 1-sanlı studentler turaq jayında 561 student jasap atırǵan bolıp, olardıń 187 si jeńillikli túrde ijara tólemlerinen azat etilgen. Basqa studentlerden ijara tólemlerin óndiriw boyınsha islenip atırǵan jumıslar haqqında maǵlıwmatlar berildi.

Institut boyınsha 3700 den aslam student ijara úylerinde jasap atırǵan bolsa, olardan tiyisli tártipte dúzilgen ijara shártnamaların tapsırǵan 1500 mıńnan aslam studentke ijara tólemlerin tólep beriw boyınsha tiyisli buyrıqlar shıǵarılǵan.

Májiliste studentler arasında jınayatshılıq, huqıqbuzarlıq, hár qıylı diniy aǵımlarǵa aralasıp qalıwdıń aldın alıw, jaslardıń mashqalaların úyreniw, olarǵa birgelikte sheshim tabıw baǵdarında keshiktirip bolmaytuǵın wazıypalar belgilenip, tiyisli juwapkerlerge tapsırmalar berildi.

NMPI baspasóz xızmeti.