Usı jıldıń 15-21-fevral kúnleri Ferǵana qalasında voleybol boyınsha hayal-qızlar arasında XXX Ózbekstan chempionatı jarısları bolıp ótti.

Jarısqa Ferǵana, Namangan, Xorezm, Jizzaq wálayatlarınan, sonday-aq, Qaraqalpaqstan Respublikasınan ulıwma 6 komanda qatnastı.

Respublikamız atınan jarıslarǵa qatnasıp kiyatırǵan Ájiniyaz atındaǵı Nókis mámleketlik pedagogikalıq institutı hayal-qızlar saylandı komandası ótkerilgen dáslepki tur oyınlarında Jizzaq mámleketlik pedagogikalıq universiteti, Xorezm wálayatı saylandı komandası, Ferǵana wálayatınıń «Tumaris», Jizzaq wálayatınıń «Zarbdor» komandalarına hesh qanday imkaniyat qaldırmay, barlıq oyınlarda 3:0 esabında jeńip shıqtı. Biraq, Namangan mámleketlik universiteti menen ótkerilgen oyında sportshılarımız 1:3 esabında imkaniyattı berip qoydı.

– Voleybol komandamız quramı jas sportshı qızlar menen tolıqtırılıp, olarǵa da usınday joqarı dárejeli jarıslarda tájiriybesin arttırıwǵa imkaniyatlar berip atırmız. Komanda quramında 2005-2006-jıllarda tuwılǵan jaslar jarısta ózleriniń sport sheberliklerin kórsete alǵanlıǵı jaqsı nátiyje boldı dep oylayman,-deydi komanda bas treneri, sport veteranı Azat Kazakov.

Solay etip, Ózbekstan chempionatınıń dáslepki tur juwmaqları boyınsha NMPI voleybol komandası 12 upay menen ekinshi orında barmaqta.

Jarıstıń ekinshi tur oyınları usı jıldıń 14-19-mart kúnleri Buxara qalasında bolıp ótiwi jobalastırılǵan.

Maǵlıwmat ornında atap ótiw kerek, Qaraqalpaqstan Respublikası atınan qatnasıp atırǵan Ájiniyaz atındaǵı Nókis mámleketlik pedagogikalıq institutı hayal-qızlar saylandı komandası ótken jılı XXIX Ózbekstan chempionatı hám superkuboginiń jeńimpazı bolıp, absolyut chempion atanǵan edi.

Komandamız aǵzalarına kelesi jarıslarda áwmet tilep qalamız!

NMPI baspasóz xızmeti.