Ózbekstan hám Túrkmenstan Respublikaları arasında diplomatiyalıq qatnasıqlardıń 30 jıllıǵı múnásibeti menen paytaxtımız Nókis qalasındaǵı Berdaq atındaǵı Qaraqalpaq mámleketlik akademiyalıq muzıkalı teatrında saltanatlı ilaj bolıp ótti.

Ilajǵa búgingi kúnde kóp milletli tatıw shańaraqlardıń birine aylanǵan Ájiniyaz atındaǵı Nókis mámleketlik pedagogikalıq institutı jámááti hám studentleri belsene qatnastı.

Búgingi kúnde institutta qaraqalpaq, ózbek, qazaq, túrkmen, rus, koreys, qırǵız, ázerbayjan, bashqurt, uyǵır hám tatar sıyaqlı ulıwma 11 milletke tiyisli studentler awızbirshilikte oqıp atır. Olar tek ǵana institutta emes, sonıń menen birge, respublikamız kóleminde ótkerilip kiyatırǵan ulıwma xalıqlıq ilajlarda da tatıwlıq penen birgelikte qatnasıp, úlken nátiyjelerdi qolǵa kirgizip kelmekte.

Túrkiy tiller fakultetinde túrkmen tili hám ádebiyatı, sonday-aq, baslawısh tálim, mektepke shekemgi tálim, matematika hám informatika hám basqa da tálim baǵdarlarında túrkmen tili toparlarında kadrlar tayarlanbaqta.

Ilajda milliy mádeniy oraylardıń kórgizbeleri shólkemlestirilip, respublikamızdıń kórkem óner sheberleri atqarıwındaǵı koncert baǵdarlaması qatnasıwshılar názerine usınıldı.

Islam Matekov,
NMPI baspasóz xatkeri.
Avtordıń túsirgen fotoları.