ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Shayır Zulfiya Israilovanıń 108 jıllıǵına arnalǵan tańlaw bolıp ótti

Ájiniyaz atındaǵı Nókis mámleketlik pedagogikalıq institutı Shet tilleri fakultetinde Ózbekstan xalıq shayırı Zulfiya Israilovanıń 108 jıllıǵı múnásibeti menen student-qızlar arasında tańlaw shólkemlestirildi.

Ilajda institut rektorınıń hayal-qızlar máseleleri boyınsha másláhátshisi S.Bekchanova, fakultet dekanınıń orınbasarı M.Allaniyazova, Zulfiya atındaǵı Mámleketlik sıylıqtıń laureatları Gúlsánem Orazbaeva hám Erkinay Orınbaevalar sózge shıǵıp, elimizde hayal-qızlar qollap-quwatlaw, olardıń bilim alıwı, ilim menen shuǵıllanıwı, kásip-óner úyreniwi ushın jaratılıp atırǵan sharayatlar, sonday-aq, fakultet student-qızlarınıń qolǵa kirgizip atırǵan tabısları haqqında aytıp ótti.

Sálemnama, óz qızıǵıwshılıqları hám qábiletleri tiykarında sheberliklerin kórsetiw, shayır Zulfiya Israilovanıń ómiri hám dóretiwshiligi boyınsha soraw-juwap shártleri tiykarında ótkerilgen tańlawda qatnasıwshı qızlar ózleriniń iyelegen bilimi, kónlikpeleri hám tayarlıqların sınaqtan ótkerdi.

Ilaj sońında tańlaw jeńimpazları, sıylı orın iyeleri hám barlıq qatnasıwshılarǵa húrmet jarlıqları, estelik sawǵaları tapsırıldı.

Z.Qaynarova,
NMPI Málimleme-resurs orayı ilimiy-metodikalıq hám maǵlıwmatlar bóliminiń baslıǵı.