Ájiniyaz atındaǵı Nókis mámleketlik pedagogikalıq institutında professor-oqıtıwshılar, izleniwshiler, doktorantlar hám magistrantlarǵa «Scopus» hám «Web of Science» maǵlıwmatlar bazaları haqqında tolıq maǵlıwmatlar beriw hám xalıqaralıq birge islesiw jumısların jolǵa qoyıw maqsetinde seminar-treningler ótkeriw jobası tastıyıqlanǵan edi.

Usı joba tiykarında instituttıń ilimiy isler hám innovaciyalar boyınsha prorektorı N.Babaniyazova basshılıǵında Málimleme-resurs orayı qánigesi R.Amanbaeva, aralıqtan oqıtıw kafedrasınıń baslıǵı G.Qıdırbaeva, qazaq tili hám ádebiyatı kafedrasınıń baslıǵı Í.Quttımuratovalar tárepinen hár bir fakultet kesiminde seminar-treningler shólkemlestirilmekte.

Ótkerilip atırǵan ilajlarda institut professor-oqıtıwshılarınıń ilimiy potencialın arttırıw maqsetinde «Scopus» hám «Web of Science» sıyaqlı xalıqaralıq ilimiy maǵlıwmatlar bazalarındaǵı impakt-faktorǵa iye jurnallarda maqalalar járiyalaw, olarǵa beriletuǵın siltemeler sanın hám h-indekslerin arttırıw boyınsha áhmiyetli wazıypalar haqqında keń túrde maǵlıwmatlar berilmekte.

Ásirese, bul processte jurnallardı tańlaw, jalǵan maǵlıwmatlarǵa iye «qaraqshı» jurnallardı parqlaw, olardıń bir-birinen ózgeshelikleri boyınsha áhmiyetli máseleler ortaǵa taslanbaqta.

Sonıń menen birge, bul baǵdarda jaqsı nátiyjelerge erisip kiyatırǵan Qazaqstan Respublikasındaǵı joqarı oqıw orınlarınıń tájiriybesi úyrenilip, tiykarǵı itibar qaratatuǵın tárepleri boyınsha pikir almasıw jolǵa qoyılmaqta.

Ótkerilip atırǵan seminar-treningler dawamında professor-oqıtıwshılar ózlerin qızıqtırǵan sorawlarǵa juwap alıp, kónlikpelerin arttırmaqta.

Bul baǵdardaǵı ilajlar fakultetler kesiminde dawam etpekte.