ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qabul 2024

Hayal-qızlarǵa húrmet kórsetildi

Xalıqaralıq hayal-qızlar bayramı múnásibeti menen Ájiniyaz atındaǵı Nókis mámleketlik pedagogikalıq institutında jumıs isleytuǵın hayal-qızlardan ibarat professor-oqıtıwshılar, texnik xızmetkerler hám basqa da qánigeler ushın bayram dasturxanı jayıldı.

Ilajda institut prorektorı Q.Qodirov, fakultet dekanları, veteran ustazlar sózge shıǵıp, barlıq hayal-qızlardı bayram menen qutlıqladı hám ilimiy-pedagogikalıq jáne mashaqatlı jumıslarında tabıslar tiledi.

Bayram keshesinde hayal-qızlarǵa húrmet kórsetilip, olarǵa sawǵalar berildi hám talantlı studentler atqarıwındaǵı koncert baǵdarlaması jıynalǵanlardıń dıqqatına usınıldı.

Hayal-qızlar kórsetilip atırǵan itibar hám ǵamxorlıqlar ushın minnetdarshılıq bildirip, bayram dasturxanı átirapında sáwbetler qurdı.

Maǵlıwmat ornında atap ótiw kerek, búgingi kúnde Ájiniyaz atındaǵı Nókis mámleketlik pedagogikalıq institutı kásiplik awqamı komitetiniń aǵzaları sanı 19 mıńnan aslamdı quraydı.

Kásiplik awqamı komiteti tiykarǵı jumısların institut rektoratı menen dúzilgen jámáátlik shártnama bántleri sheńberinde alıp baradı.

Jámáátlik shártnama tiykarında xızmetkerlerge qosımsha xoshametlew pulları, materiallıq járdemler beriliwi turaqlı alıp barılmaqta. Sonıń menen birge, ǵalabalıq-mádeniy, qayır-saqawat ilajları, bayram sáneleri, professor-oqıtıwshılar, studentlerdiń bos waqıtlarında elimizdiń tariyxıy qalaları boylap sayaxatlarǵa alıp shıǵıw, jumıs islewshiler hám olardıń perzentlerine dem alıw jáne sawallandırıw oraylarına jollamalar beriw sıyaqlı ilajlarǵa da qarjılar ajıratıladı.

Bayramǵa arnalǵan ilajlar institut kóleminde dawam etpekte.

NMPI baspasóz xızmeti.