ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Professor-oqıtıwshılar «aqıl gimnastikası» boyınsha óz imkaniyatların sınap kórdi

Nawrız ulıwma xalıqlıq bayramı múnásibeti menen Ájiniyaz atındaǵı Nókis mámleketlik pedagogikalıq institutında professor-oqıtıwshılar arasında shaxmat hám shashka boyınsha jarıs bolıp ótti.

Institut rektoratı, sport klubı hám kásiplik awqamı komiteti tárepinen shólkemlestirilgen jarısta erler hám hayal-qızlardan ibarat oqıtıwshılar aqıl gimnastikası dep táriyp beriletuǵın, sonday-aq, jedel pikirlewge hám qarar qabıl etiw qábiletlerin arttıratuǵın shashka oyınları boyınsha óz imkaniyatların sınaqtan ótkerdi.

Prezidentimizdiń usı jıldıń 14-yanvar kúngi «Shaxmattı bunnan bılay da rawajlandırıw hám ǵalabalastırıw jáne shaxmatshılardı tayarlaw sistemasın jetilistiriw ilajları haqqında»ǵı qararı tiykarında institutta professor-oqıtıwshılar hám studentler, basqa da taraw xızmetkerleri arasında shaxmat, shashka oyınları boyınsha jarıslar turaqlı shólkemlestirilmekte. Bunda instituttıń shaxmat boyınsha treneri Genjebay Utepbergenovtıń da pidayı miynetlerin atap ótiw orınlı.

Jarıs juwmaǵında jeńimpazlar hám sıylı orın iyeleri anıqlanıp, institut rektoratı hám sport klubı atınan diplom, kásiplik awqamı komiteti atınan estelik sawǵaları menen sıylıqlandı.

NMPI baspasóz xızmeti.