ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPIde Nawrız bayramına arnalǵan qızlar forumı hám birqatar tańlawlar bolıp ótti

Búgin, 16-mart kúni Nawrız ulıwma xalıqlıq bayramı múnásibeti menen Ájiniyaz atındaǵı Nókis mámleketlik pedagogikalıq institutında «Qábiletli qızlar – shańaraq tiregi» atamasındaǵı qızlar forumı hám birqatar tańlawlar bolıp ótti.

Forum sheńberinde ótkerilgen tańlawlarda dáslep student-qızlar aspazlıq óneri boyınsha óz sheberliklerin kórsetiwge háreket etti. Somsa pisiriw, báhárgi máwsimge say salat tayarlaw boyınsha qatnasıwshı qızlardıń aspazlıq sheberliklerin Qaraqalpaqstan Respublikası aspazlar birlespesiniń wákilleri bahalap bardı.

Sonday-aq, «Qolı gúl qız» atamasındaǵı tańlawda hár bir fakultetten bir qatnasıwshı belgilengen waqıt aralıǵında reńli qaǵazlardan gúl islew ónerin kórsetti.

«Sózi shiyrin, tili pal qız» atamasında ótkerilgen jáne bir tańlawda qızlar poeziyalıq hám prozalıq shıǵarmalar, dóretiwshilik úlgileri hám monologlardı kórkemlep oqıw boyınsha óz tayarlıqların kórsetiwge háreket etti.

Tańlawlardıń barısı tóreshiler quramı aǵzaları tárepinen bahalandı hám jeńimpazlar, sıylı orın iyeleri anıqlandı.

Tańlaw jeńimpazlarına hám barlıq qatnasıwshı qızlarǵa instituttıń kásiplik awqamı komiteti tárepinen qımbat bahalı hám estelik sawǵaları tapsırıldı.

Institutta ulıstıń ullı kúni – Nawrız bayramına arnalǵan ilajlar dawam etpekte.

NMPI baspasóz xızmeti.