ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Belgili filolog alım Eshbay Xojaniyazovtıń 80 jıllıǵına arnalǵan ilimiy konferenciya bolıp ótti

Ájiniyaz atındaǵı Nókis mámleketlik pedagogikalıq institutında filologiya ilimleriniń kandidatı, docent, Qaraqalpaqstan Respublikasına miyneti sińgen ilim ǵayratkeri, Ózbekstan hám Qaraqalpaqstan Respublikaları xalıq bilimlendiriw aǵlası Eshbay Xojaniyazovtıń 80 jıllıǵına arnalǵan «Túrkiy filologiyanıń áhmiyetli máseleleri: teoriya hám innovaciyalıq bilimlendiriw texnologiyaları» atamasındaǵı respublikalıq ilimiy-ámeliy konferenciya bolıp ótti.

Konferenciyanıń ashılıw plenar májilisin instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Onda instituttıń ózbek tili kafedrasınıń professorı, filologiya ilimleriniń doktorı G.Qurbaniyazov, ózbek ádebiyatı kafedrasınıń docenti, filologiya ilimleriniń kandidatı K.Tashanov hám basqalar ilimpazdıń ómiri, ilimiy-pedagogikalıq jumısları, keleshek áwladlarǵa qaldırǵan biybaha miyrasları haqqında maǵlıwmatlar berdi.

E.Xojaniyazov 1943-jıl 16-yanvarda Qaraqalpaqstan Respublikasınıń Ámiwdárya rayonında tuwılǵan. 1965-jılı Samarqand mámleketlik universitetin pitkerip kelgennen soń, 9 jıl dawamında ózi tuwılıp ósken rayondaǵı 36-sanlı mektepte balalarǵa ana tili hám ádebiyatı páninen sabaq berdi.

Ol 1974-jıldan baslap 1990-jılǵa shekem Qaraqalpaq mámleketlik universitetinde, 1990-jıldan ómiriniń aqırına shekem Nókis mámleketlik pedagogikalıq institutı Ózbek tili kafedrasında studentlerge ilim sırların úyretip keldi. Dáslep usı kafedrada oqıtıwshı, úlken oqıtıwshı, docent lawazımlarında hár tárepleme jemisli miynet etti.

Ol ózbek tili hám ádebiyatı bakalavriat tálim baǵdarı hám magistratura qánigelikleri studentlerine ózbek til iliminiń teoriyalıq hám mashqalalı máselelerinen sabaq berdi. Sabaqlardı ilimiy, aldınǵı pedagogikalıq texnologiyalar tiykarında, studentlerdiń baslaması hám qızıǵıwshılıǵın itibarǵa alǵan halda alıp barıwǵa eristi. Sol sebepli de ol kásilpesleri hám studentler arasında úlken abıroy hám húrmetke iye bolıp, olardıń itibarına miyasar boldı.

E.Xojaniyazov tálim-tárbiya jumısların ilimiy isler menen birge alıp barıwǵa háreket etti hám ózbek til iliminiń eń kem úyrenilgen tarawı – ózbek tili stilistikası menen qızıǵıp, 1984-jılı «Ózbek ádebiy tili ilimiy hám kórkem stillerinde atributiv birikpelerdiń semantikalıq-stilistikalıq ózgeshelikleri» atamasında kandidatlıq dissertaciyasın tabıslı jaqlap shıqtı. Keyin ala ilimpazdıń «Oʻzbek adabiy tili ilmiy va badiiy uslublarining uslubiy belgilari» (1989), «Вопросы словосочетания в тюркских языках» (jámáátlik avtorlar menen birgelikte, 1993), «Hozirgi oʻzbek adabiy tili» (2003, 2011. jámáátlik avtorlar menen birgelikte) sıyaqlı kitapları hám til iliminiń mashqalalı máselerine arnalǵan 100 den artıq ilimiy hám ilimiy-stilistikalıq maqalaları baspadan shıqtı.

Konferenciyada túrkiy xalıqlardıń til bilimi hám ádebiyattanıwında alǵa súrilip atırǵan jańasha kózqaraslar, bilimlendiriwdi shólkemlestiriw baǵdarındaǵı innovaciyalıq ideyalar, oqıtıw usılları, ulıwma orta bilim beriw mektepleri, joqarı hám orta arnawlı bilimlendiriw mákemelerinde til hám ádebiyattı oqıtıwda qollanılatuǵın oqıw ádebiyatlarınıń dárejesi, jańa áwlad oqıw ádebiyatların jaratıw máseleleri keń túrde dodalandı.

NMPI baspasóz xızmeti.