Búgin, 4-aprel kúni Ájiniyaz atındaǵı Nókis mámleketlik pedagogikalıq institutında Tashkent mámleketlik yuridika universiteti tárepinen shólkemlestirilgen «Úgit-násiyat poezdi» joybarınıń qatnasıwshıları menen ushırasıw bolıp ótti.

Ózbekstannıń barlıq aymaqları boylap xalqımızdıń, ásirese, jaslardıń huqıqıy sawatlılıǵı, sonıń ishinde, jańalanıp atırǵan Konstituciya hám referendum haqqındaǵı bilim jáne kónlikpelerin arttırıw maqsetinde shólkemlestirilgen úgit-násiyat ilajına instituttıń belsendi student-jasları qatnastı.

Ushırasıwda Tashkent mámleketlik yuridika universitetiniń studentleri «Teńleske-teńles» principi tiykarında Ózbekstan Respublikasınıń jańa redakciyadaǵı Konstituciyası haqqında qatnasıwshılarǵa tolıq maǵlıwmatlar berdi.

Atap ótilgenindey, jańa redakciyadaǵı Konstituciya Ózbekstan jámiyetshiliginiń evolyuciyalıq rawajlanıwınan kelip shıǵıp atırǵan turmıslıq zárúrlik bolıp, bul mámleket, millet hám xalıq sıpatında keyingi qádemlerimizdi anıqlap alıwımız ushın oǵada áhmiyetli másele, ádil jámiyet qurıw jolındaǵı úlken qádem bolıp tabıladı.

Áhmiyetlisi, bunda dáslep eki basqıshta xalqımızdıń pikir-usınısları úyrenilgen bolsa, bunnan soń Konstituciya joybarı tayarlandı.

Dáslepki basqıshta Konstituciya joybarın qáliplestiriw ushın puqaralarımız tárepinen 60 mıńnan aslam usınıslar berildi. Olardıń hár tórtewden biri joybardan orın aldı.

Ekinshi basqıshta Konstituciya joybarı ulıwma xalıqlıq dodalawǵa qoyıldı. Ǵalaba xabar quralları, internet tarmaqları arqalı joybar menen 5 million xalıq tanısıp, 150 mıńnan aslam usınıs hám pikirlerin bildirdi.

Sonday-aq, miynet jámáátleri, joqarı oqıw orınları, mákan puqaralar jıyınlarınıń belsendileri hám ziyalılar menen ótkerilgen dodalawlarda da derlik 10 mıńǵa shamalas qosımsha usınıslar berildi. Sonıń menen birge, xalıqaralıq-huqıqıy hújjetler hám 190 nan aslam mámleketlerdiń tájiriybesi úyrenildi, joybar 6 túrli ekspertizadan ótkerildi.

Bulardıń barlıǵı jańa redakciyadaǵı Konstituciyada jámiyettiń barlıq qatlamlarınıń mápleri esapqa alınǵanı, Jańa Ózbekstandı qurıw ideyası dógereginde pútkil jámiyetimiz birleskeni, Bas Nızamımız shın mánisindegi xalıq Konstituciyası bolıp atırǵanınan dárek beredi.

Ilaj óz ara soraw-juwaplar hám pikir almasıwlar menen dawam etti.

NMPI baspasóz xızmeti.