ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

NMPIde «Xalıqaralıq quslar kúni»ne arnalǵan bayram keshesi bolıp ótti

Ájiniyaz atındaǵı Nókis mámleketlik pedagogikalıq institutında 1-aprel – Xalıqaralıq quslar kúni múnásibeti menen Tábiyǵıy pánler fakulteti shólkemlestiriwinde bayram keshesi bolıp ótti.

Ilaj fakultet úy sharayatında baǵılatuǵın quslar, olardıń jasaw sharayatları, turmısına baylanıslı studentler tárepinen islengen plakatlar, qol óneri úlgilerinen ibarat kórgizbe menen baslandı.

Keshede fakultet dekanı Q.Reymov hám Ózbekstan Ekologiyalıq partiyası Qaraqalpaqstan Respublikası partiya shólkeminiń baslıǵı A.Begimova sózge shıǵıp, ana tábiyatımızda, elimizdiń biologiyalıq kóp túrliliginde quslardıń ornı, olardı qorǵaw, sonıń menen birge, Aralboyı aymaǵında toǵaylıqlardı payda etiw baǵdarında ámelge asırılıp atırǵan jumıslardıń áhmiyeti haqqında atap ótti.

Bayram keshesinde studentler tábiyatımızda ushıraytuǵın quslar, olardıń jasaw sharayatları, ózgeshelikleri haqqında ilaj qatnasıwshılarına kórgizbeli qurallar, prezentaciyalar arqalı maǵlıwmatlar berdi.

Ilaj fakultettiń talantlı studentleri, sonday-aq, instituttıń «Tumaris» ansambli, muzıkalıq tálim baǵdarınıń studentleri atqarıwındaǵı koncert baǵdarlaması hám qızıqlı viktorinalıq oyınlar menen dawam etti.

Keshe dawamında ótkerilgen tańlawlarda «Quslarǵa eń kop berilgen táriyp», «Qustıń eń sulıw súwreti», «Eń kóp hár túrli quslardı toplaǵan topar» sıyaqlı birneshe nominaciyalar boyınsha jeńimpaz bolǵanlar hám belsene qatnasqan studentler fakultet dekanatı tárepinen sıylıqlandı.

NMPI baspasóz xızmeti.