NMPIde III Respublikalıq kitapqumarlıq hápteliginiń ashılıw ilajı bolıp ótti
Ózbekstan Respublikası Ministrler Kabinetiniń «2020-2025-jıllarda kitapqumarlıq mádeniyatın rawajlandırıw hám qollap-quwatlaw milliy baǵdarlamasın tastıyıqlaw haqqında»ǵı qararına muwapıq Ózbekstan Respublikasında 2021-jıldan baslap hár jılı aprel ayınıń birinshi háptesi «Kitapqumarlıq hápteligi» dep belgilengen.
Usı tiykarda Ájiniyaz atındaǵı Nókis mámleketlik pedagogikalıq institutında «Kitap hám kitapqumarlıq – insannıń ruwxıy aynası» atamasındaǵı III Respublikalıq kitapqumarlıq hápteliginiń ashılıw ilajı bolıp ótti.
Ilajdı institut Málimleme-resurs orayınıń direktorı Q.Qulmuratov ashıp berdi.
Ilajǵa Ózbekstan hám Qaraqalpaqstan Jazıwshılar awqamınıń aǵzası, «Doslıq» ordeniniń iyesi, shayır J.Óteniyazov, instituttıń qaraqalpaq ádebiyatı kafedrasınıń docenti S.Báwetdinova, Málimleme-resurs orayı xızmetkerleri hám studentler qatnastı.
Onda Málimleme-resurs orayı xızmetkeri D.Erlepesova «Kitap – ótmishimiz, búginimiz hám keleshegimiz» atamasında bayanat jasadı. Sonday-aq, 2022-jılı Áliysher Nawayı atındaǵı Ózbekstan Milliy kitapxanasında bolıp ótken II Respublikalıq kitapqumarlıq hápteliginde «Kitapxana aǵlası» kókirek belgisi menen sıylıqlanǵan oraydıń bólim baslıǵı R.Amanbaeva studentlerge óziniń kitapxanada islegen 33 jıllıq miynet jolı haqqında aytıp berdi.
Ilaj oǵada qızıqlı hám mazmunlı ótti. Eń úlgili studentler hám kitapqumar jaslar oray tárepinen húrmet jarlıqları menen sıylıqlandı.
Z.Qaynarova,
NMPI ilimiy-metodikalıq hám maǵlıwmatlar bólimi baslıǵı.