Ájiniyaz atındaǵı Nókis mámleketlik pedagogikalıq institutında Tábiyǵıy pánler fakulteti botanika, ekologiya hám onı oqıtıw metodikası kafedrasınıń professor-oqıtıwshıları hám biologiya tálim baǵdarınıń studentleri tárepinen «Gúller bayramı» atamasındaǵı bayram keshesi shólkemlestirildi.

Ilaj fakultet studentleri tárepinen shólkemlestirilgen gúller kórgizbesi menen baslandı. Kórgizbeden respublikamızda hám sırt ellerde ósiriletuǵın hár túrli gúller, sonday-aq, jaslardıń qol óneri úlgileri, gúllerdiń kórinisleri sáwlelengen súwretler orın aldı.

Bayram keshesinde studentler gúllerdiń túrleri, olardıń ózgeshelikleri, paydalı tárepleri haqqında prezentaciya formasında maǵlıwmatlar berdi. Sonday-aq, gúller menen baylanıslı hár qıylı qızıqlı soraw-juwaplar, viktorina oyınları ótkerildi.

– «Gúller bayramı» institutımızda hár jılı belgilenedi. Bayram keshesi tańlaw tárizinde shólkemlestirilip, studentler xoshametlenedi. Bunnan gózlegen baslı maqsetimiz jaslardıń ana tábiyatımızǵa bolǵan muhabbatın arttırıw, qorshaǵan ortalıqtı, ósimlikler hám haywanatlar dúnyasın qorǵaw boyınsha ámeliy kónlikpelerdi payda etiwden ibarat, — deydi NMPI Botanika, ekologiya hám onı oqıtıw metodikası kafedrasınıń docenti Nadira Mirametova.

Ilaj fakultet studentleriniń atqarıwındaǵı koncert baǵdarlaması menen dawam etti.

Bayramǵa belsene qatnasqan studentler birneshe nominaciyalar boyınsha fakultet dekanatı tárepinen sıylıqlandı.

NMPI baspasóz xızmeti.