Ájiniyaz atındaǵı Nókis mámleketlik pedagogikalıq institutı Málimleme-resurs orayında III Respublikalıq kitapqumarlıq hápteligi sheńberinde birqatar ádebiy kesheler shólkemlestirildi.

Professor Q.Qochanov, filolog ilimpaz T.Kerwenov, jas ádebiyatshı hám shayır A.Dármenov hám institut rektorınıń hayal-qızlar máseleleri boyınsha másláhátshisi, ózbek ádebiyatı kafedrasınıń baslıǵı S.Bekchanovalar menen ótkerilgen ushırasıwda ózbek, qaraqalpaq, qazaq, túrkmen ádebiyatınıń bir-biri menen tıǵız baylanıslılıǵı haqqında pikir almasıldı.

Sonday-aq, dúnyaǵa belgili qırǵız jazıwshısı Shıńǵıs Aytmatovtıń 95 jıllıǵına arnalǵan ádebiy keshede qaraqalpaq ádebiyatı kafedrasınıń docenti S.Bawetdinova, stajyor-oqıtıwshı A.Dármenov hám oray xızmetkerleri tárepinen studentlerge jazıwshınıń ómiri jáne dóretiwshiligi haqqında maǵlıwmatlar berildi.

Háptelik ilajları sheńberinde instituttıń ulıwma pedagogika hám psixologiya kafedrası aǵa oqıtıwshıları K.Kenjebaeva, L.Saparova hám oray xızmetkerleri, tyutorlar, studentler qatnasıwında shańaraqtıń bekkemlegin támiyinlew, shańaraqta jaslar tárbiyası, jas shańaraqlardı qollap-quwatlaw baǵdarında ámelge asırılıp atırǵan jumıslar dodalandı.

Hápteliktiń juwmaqlanıwına arnalǵan ushırasıwda Qaraqalpaqstanǵa miyneti sińgen mádeniyat xızmetkeri, «Doslıq» ordeniniń iyesi, Jazıwshılar awqamınıń aǵzası, shayır Gúlistan Dáwletova hám belgili jazıwshı Oralxan Saparovalar miymanda boldı.

Ilajda shayır hám jazıwshı apalarımızdıń dóretiwshiligi haqqında studentlerge keń túrde maǵlıwmatlar berilip, soraw-juwaplar ótkerildi.

Ushırasıw juwmaǵında instituttıń oqıw isleri boyınsha prorektorı M.Jumamuratov III Respublikalıq kitapqumarlıq hápteligi institutımızda joqarı shólkemleskenlik penen ótkerilgenin atap ótip, belsene qatnasqan oray xızmetkerlerine alǵısnamalardı tapsırdı.

NMPI baspasóz xızmeti.