Aldın xabar bergenimizdey, usı jıldıń 17-18-aprel kúnleri Tashkent qalasında Workout boyınsha bolıp ótken «Universiada-2023» sport jarıslarınıń respublikalıq basqıshında erler arasında ótkerilgen jarısta Qaraqalpaqstan Respublikası saylandı komandası sıylı 3-orındı iyeledi hám bronza medalların qolǵa kirgizgen edi.

Búgin, 20-aprel kúni Nókis temir jol vokzalında sportshı jaslar hám olardıń trenerlerin kútip alıw ilajı bolıp ótti.

Ilajǵa joqarı oqıw orınlarınıń wákilleri, sportshılardıń ata-anaları, keń jámiyetshilik hám ǵalaba xabar quralları wákilleri qatnastı.

Onda sózge shıqqanlar student-jaslardı hám olardıń trenerlerin qolǵa kirgizgen tabısları menen qutlıqladı.

Respublikamız saylandı komandasınıń bunday nátiyjeni qolǵa kirgiziwinde komanda quramında qatnasqan Ájiniyaz atındaǵı Nókis mámleketlik pedagogikalıq institutı studentleri Otabek Sharapov, Islom Tilovboev, Izzatbek Karimov, Oǵabek Matopaev hám Berdaq atındaǵı Qaraqalpaq mámleketlik universiteti studenti Dosbergen Azatov hám olardı jarısqa tayarlaǵan tájiriybeli trener-oqıtıwshılar Ali Eshbaev, Serik Abuov, Nókisbay Akimovlardıń miynetlerin ayrıqsha atap ótiwimiz kerek.

– «Kóshe gimnastikası» dep atalatuǵın Workout sportı sońǵı jıllarda elimizde ǵalabalasıp barmaqta. Bunıń ushın hár bir aymaqta, máhállelerde sport maydanshaları qurılǵan. Bıyılǵı jılı birinshi márte «Universiada» sport jarısları qatarına qosılǵanı bul sporttıń jaslarımız arasında ele de en jayıwına tiykar boldı. Ózbekstannıń 14 aymaǵınan sportshı jaslar qatnasqan jarısta erler komandamızdıń sıylı 3-orındı, qızlarımızdıń 5-orındı bánt etiwi, álbette, dáslepki qádemlerimizdiń nátiyjeli ekenliginen dárek beredi, – deydi trener Ali Eshbaev.

Biz komanda aǵzaların qolǵa kirgizgen tabısları menen jáne bir márte qutlıqlaymız!

NMPI baspasóz xızmeti.