Berdaq atındaǵı Qaraqalpaq mámleketlik akademiyalıq muzıkalı teatrında Qaraqalpaqstan xalıq baqsısı Ámet Tariyxov tuwılǵanınıń 100 jıllıǵına baǵıshlanıp hám III Xalıqaralıq baqsıshılıq kórkem óneri festivalı aldınan respublikalıq baqsılar tańlawı bolıp ótti.

Qaraqalpaq milliy baqsıshılıq kórkem ónerin rawajlandırıw, talantlı jaslardı júzege shıǵarıw hám qollap-quwatlaw maqsetinde ótkerilgen bul tańlawǵa respublikamızda dóretiwshilik etip atırǵan qırıqtan aslam talantlı baqsı-jırawlar, qábiletli jaslar qatnastı.

Quwanıshlı tárepi, tańlawda Ájiniyaz atındaǵı Nókis mámleketlik pedagogikalıq institutı muzıkalıq tálim hám kórkem óner qánigeliginiń 2-kurs magistrantı Gúlshınar Qudaybergenova 1-orındı iyelep, jeńimpaz bolǵan bolsa, muzıkalıq tálim baǵdarınıń studenti Ótkirbay Azerbaev 3-orındı iyeledi.

Sonday-aq, tańlawda muzıkalıq tálim hám kórkem óner qánigeliginiń magistrantları – Erkinay Orınbaeva «Eń jaqsı ırǵaq iyesi» hám Ońǵarbay Joldıbaev «Eń jaqsı dástan atqarıwshısı» nominaciyalarınıń jeńimpazı dep tabıldı.

Jeńimpazlar shólkemlestiriwshiler tárepinen diplom hám bahalı sawǵalar menen sıylıqlandı.

Usınday joqarı nátiyjelerge erisip atırǵan jas talant iyelerin institutımız jámááti atınan qutlıqlaymız!

NMPI baspasóz xızmeti.