Nókis mámleketlik pedagogikalıq institutında bilim alıp atırǵan student jaslar ushın studentler turaq jayları qurılıp atır

Ájiniyaz atındaǵı Nókis mámleketlik pedagogikalıq institutınıń materiallıq-texnikalıq bazasın jaqsılaw boyınsha sonǵı jılları keń qamtıwlı, kólemli jumıslar ámelge asırılmaqta.

Házirgi waqıtta institutta studentlerdi turaq jay menen támiyinlew, olardı jataqxanalar menen qamtıp alıw jumısların jaqsılaw maqsetinde 5 orında, ulıwma 1 mıń 550 orınlıq studentler turaq jaylarınıń qurılıs-rekonstrukciya jumısları dawam ettirilip atır.

Atap aytqanda, instituttıń byudjetten tıs qarjıları esabınan 23 milliard 704 million sum ajıratılıp, jańadan 500 orınlıq jataqxana qurılmaqta. Sonıń menen birge, institut bas imaratı janındaǵı 100 orınlıq hám Ellikqala pedagogika fakultetiniń 150 orınlıq studentler turaq jaylarında rekonstrukciya jumısları qızǵın pátte dawam ettirilmekte.

Sonday-aq, institut kampusınan mámleketlik-jeke sheriklik tiykarında 23 milliard 200 million sumlıq 400 orınǵa mólsherlengen jańa studentler turaq jayınıń qurılıs jumısları da qızǵın dawam etpekte. Studentlerdi turaq jay menen támiyinlewde isbilermenlik subektleri menen nátiyjeli birge islesiw jolǵa qoyılǵan bolıp, bunıń ayqın kórinisi sıpatında isbilermenniń óz balansındaǵı imarattı qayta ońlaw jumısları tiykarında 400 orınlıq jataqxanaǵa aylandırıp, paydalanıwǵa tapsırıwdı jobalastırıp atırǵanın atap ótiw orınlı.

Juwmaqlap aytqanda bıyılǵı jıldıń avgust ayına shekem student jaslar ushın taza jataqxanalar tayar halǵa keltiriledi.

Qaraqalpaqstan Respublikası Joqarǵı Keńesiniń Málimleme xızmeti.