Student-jaslarǵa sapalı bilim beriw baǵdarında Ájiniyaz atındaǵı Nókis mámleketlik pedagogikalıq institutında oqıw hám ilimiy-izertlew jumıslarınıń nátiyjeliligin arttırıw maqsetinde institut sport sarayı hám ilimiy-ámeliy laboratoriyasınıń qurılıs-rekonstrukciya jumısları dawam etip atır.

Sonıń menen birge, institutta respublikamızda birinshilerden bolıp mektepke shekemgi bilimlendiriw baǵdarı boyınsha klasster usılında kadr tayarlawǵa ayrıqsha dıqqat awdarılıp, bul boyınsha ámeliy jumıslar baslap jiberilgen.

Atap aytqanda, fakultet janınan 90 orınǵa mólsherlengen balalar baqshasınıń qurılıs jumıslarına instituttıń byudjetten tıs qarjıları esabınan 4,5 milliard sum ajıratılıp, búgingi kúnde juwmaqlanıw aldında turıptı.

Bul jerde mektepke shekemgi tálim baǵdarınıń studentleri, magistrant hám doktorantları ushın hár qıylı metodikalardı qollanıw arqalı balalarda kreativ oylaw, jámiyetshilik penen qarım-qatnas sıyaqlı kónlikpelerdi payda etiwge tiykar jaratıladı. Sonıń menen birge, fakultette mektepke shekemgi bilimlendiriw tarawı boyınsha qánigelikti bahalaw orayınıń jumısı da jolǵa qoyılıwı belgilengen. Bul arqalı respublikamızda jumıs islep atırǵan balalar baqshalarındaǵı tárbiyashı-pedagoglar jáne metodistlerdiń bilim hám tájiriybelerin arttırıwǵa kómeklesiw tiykarǵı maqset etip qoyılǵan.

Bunday jumıslardıń barlıǵı elimizde keleshek áwladlar tárbiyası baǵdarında alıp barılıp atırǵan reformalardıń ámeliy nátiyjeleri bolıp esaplanadı.

Qaraqalpaqstan Respublikası Joqarǵı Keńesiniń Málimleme xızmeti.