ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Eslew hám qádirlew kúni jáne fashizm ústinen erisilgen jeńistiń 78 jıllıǵına arnalǵan ushırasıw bolıp ótti

Ájiniyaz atındaǵı Nókis mámleketlik pedagogikalıq institutında 9-may – Eslew hám qádirlew kúni, sonday-aq, Ekinshi jer júzilik urısta fashizm ústinen erisilgen jeńistiń 78 jıllıǵına arnalǵan ushırasıw keshesi bolıp ótti.

Keshege Arqa-batıs áskeriy okrugi Veteranlar keńesiniń baslıǵı, rezervtegi podpolkovnik A.Yusupov, Qaraqalpaqstan Respublikasına miyneti sińgen jaslar ustazı, rezervtegi podpolkovnik B.Yuldashev, áskeriy okrug Veteranlar keńesi baslıǵınıń orınbasarı, rezervtegi serjant B.Qalmuratov, Ishki isler ministrligine qaraslı áskeriy bólimde múddetli áskeriy xızmetin atqarıp atırǵan jaslar hám institut professor-oqıtıwshıları jáne studentleri qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp bardı.

Keshede sózge shıqqanlar mámleketimizde 9-may ulıwmaxalıqlıq bayram – Eslew hám qádirlew kúni sıpatında keńnen belgilenip, Ekinshi jer júzilik urısta qaza tapqan ata-babalarımızdıń esteligine tereń húrmet kórsetilip, fashizmge qarsı sawashlarda, miynet frontında mártlik kórsetken veteranlarımızǵa ayrıqsha itibar hám húrmet kórsetiw, jaslardı ruwxıy-ádep ikramlılıq jaqtan tárbiyalawǵa úles qosıp atırǵan veteranlardı qádirlew, urıs qatnasıwshıları hám mayıplardı xoshametlew baǵdarında kóplegen ilajlar shólkemlestirilmekte.

Elimizde «Insan qádiri ushın» degen úlken maqsetler jolında búgingidey tınısh hám abadan turmısımız ushın óz janın pidá etip, barlıq kúsh-jigerin jawızlıqtı joq etiwge, keleshek áwladlar ushın múnásip turmıs sharayatın jaratıwǵa sarplaǵan ata-babalarımız benen qanshelli maqtanısh etsek arzıydı.

Ilaj barısında usınday rawajlanıwlarǵa qaray nıq qádemler taslap atırǵan mámleketimizdiń gúllep-jaynawına hár birimiz óz úleslerimizdi qosıwımız, bárqulla qıraǵılıqtı joǵaltpastan, zamanagóy bilim hám kónlikpelerge iye joqarı potenciallı qánigeler bolıp jetilisiw zaman talabı ekenligi turmıslıq mısallar menen atap ótildi.

Institutta Eslew hám qádirlew kúni bayramına arnalǵan ilajlar dawam etpekte.

NMPI baspasóz xızmeti.