Ózbekstan Respublikası Prezidenti basshılıǵında ótkerilgen keńeytilgen videoselektor májilisinde pedagog kadrlardıń tájiriybesin arttırıw hám bilimlendiriwdiń sapasın kóteriw maqsetinde kadrlar tayarlaytuǵın joqarı oqıw orınlarınıń fakultetlerine ulıwma bilim beriw mektepleri biriktirilgen edi.

Usı tiykarda Ájiniyaz atındaǵı Nókis mámleketlik pedagogikalıq institutı Shet tilleri fakulteti Nókis qalasındaǵı shet tillerin úyreniwge qánigelestirilgen 31-sanlı ulıwma orta bilim beriw mektebi menen birgelikte jumıs alıp barmaqta.

Rus tili hám ádebiyatı kafedrası oqıtıwshıları – docent E.Eshniyazova, úlken oqıtıwshılardan G.Genjebaeva hám M.Tursınova, sonday-aq, magistrant M.Mubarakovlar usı mektepte rus tili hám ádebiyatı boyınsha sabaqlardıń barısın kózden ótkerdi. Sonday-aq, mektepte «Dúnya júzilik kitap kúni»ne baǵıshlanǵan «Kitap – eń jaqsı dos» atamasındaǵı ilajdı shólkemlestirdi.

Shet tillerin úyreniw boyınsha mekteptiń rus tili hám ádebiyatı páni muǵallimleri menen birgelikte sabaqlıqlar haqqında pikirlesti.

Ushırasıwda mektep muǵallimlerine oqıtıwda oqıw hám jazıw arqalı kritikalıq pikirlewdi rawajlandırıw texnologiyası boyınsha túsinikler berildi, usı texnologiyalardı ámeliyatta paydalanıw boyınsha metodikalıq kórsetpeler, sabaqlardıń sapasın arttırıw boyınsha pikirler bildirilip, mektepte tálim-tárbiya processlerin jaqsılaw boyınsha másláhátler berildi.

I.Dilmanov,
Ájiniyaz atındaǵı NMPI Shet tilleri fakulteti dekanı.