Ájiniyaz atındaǵı Nókis mámleketlik pedagogikalıq institutı Tariyx fakulteti milliy ideya, ruwxıylıq tiykarları hám huqıq tálimi kafedrası tárepinen «Jańa Ózbekstan ideyası hám rawajlanıw basqıshınıń ruwxıy-aǵartıwshılıq, siyasiy-huqıqıy, sociallıq-ekonomikalıq tiykarları» atamasındaǵı respublikalıq ilimiy-teoriyalıq konferenciya shólkemlestirildi.

Ilajǵa Respublikalıq Ruwxıylıq hám aǵartıwshılıq orayı Qaraqalpaqstan Respublikalıq bólimi baslıǵı, tariyx ilimleriniń kandidatı, professor Tatlımurat Atamuratov, oray qasındaǵı Sociallıq-ruwxıy izertlew institutınıń bólim baslıǵı, siyasiy ilimler doktorı Mansur Musaev, professor-oqıtıwshılar, doktorantlar, magistrantlar hám studentler qatnastı.

Konferenciyanı instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Quvondiq Qodirov basqarıp bardı.

Konferenciyanıń baslı maqseti jańa Ózbekstan ideyasınıń mazmunı hám ruwxıy-aǵartıwshılıq jumıslarınıń áhmiyeti, globallasıw procesinde «Jańa Ózbekstan ideyası»nıń ulıwma insanıylıq principleri, jańalanıp atırǵan Ózbekstanda ruwxıy hám huqıqıy tárbiyanıń ózine tán ózgeshelikleri, «Jańa Ózbekstan – sociallıq mámleket» principinde insan qádiri hám insan mápi máseleleri, mámlekettiń rawajlanıwında jaslar fenomeni máselelerin bunnan bılay da tereń úyreniw, izertlew júrgiziw hám nátiyjelerin ámeliyatqa engiziwden ibarat bolıp tabıladı.

Ilajda jańa Ózbekstanda missionerlik háreketin saplastırıwdıń ruwxıy-ideologiyalıq faktorları, studentlerdiń sociallıq belsendilik kompetenciyaların rawajlandırıw máseleleri, jámiyette hayal-qızlardıń rolin arttırıw, Ibrayım Yusupov shıǵarmalarınıń jaslardıń ruwxıy tárbiyasındaǵı áhmiyeti, ekologiyalıq qáwipsizlik hám turaqlı rawajlanıw, puqaralıq jámiyette ruwxıylıqtıń aktuallıǵı tematikaları boyınsha bayanatlar jasaldı.

NMPI baspasóz xızmeti.