Sociallıq tarmaqlarda grant tiykarında oqıǵan joqarı oqıw orınları pitkeriwshileriniń májbúriy tártipte keminde 3 jıl jumıs islep beriw talabı biykarlanǵanı haqqında tarqalıp atırǵan xabarlar boyınsha Joqarı bilimlendiriw, ilim hám innovaciyalar ministrligi tómendegilerdi málim etti.

Prezidenttiń 2005-jıl 2-iyundaǵı qararı 6-bántinde Joqarı hám orta arnawlı bilimlendiriw ministrligine tiyisli ministrlik jáne mákemeler menen birgelikte Kadrlardı mámleketlik grantlar tiykarında maqsetli tayarlaw haqqındaǵı rejeni islep shıǵıw júkletilgen.

Usı tapsırma tiykarında 2005-jıl 7-iyuldaǵı 58-, 154-1-, 19- hám 02/2658-sanlı qararǵa muwapıq Kadrlardı mámleketlik grantlar tiykarında maqsetli tayarlaw tártibi haqqındaǵı reje tastıyıqlanǵan. Onda joqarı oqıw orınların mámleketlik grant tiykarında oqıp tamamlaǵan pitkeriwshilerdiń úsh jıl jumıs islep beriw minnetlemesi belgilengen.

Mámleketimiz basshısınıń 2022-jıl 15-iyundaǵı 279-sanlı qararınıń 3-qosımshasına muwapıq Prezidenttiń ayırım qararları, sonıń ishinde, 2005-jıl 2-iyundaǵı 92-sanlı qararı óz kúshin joǵaltqan dep tabıldı. Biraq, usı qarardıń orınlanıwına muwapıq islep shıǵılıp, tastıyıqlanǵan Kadrlardı mámleketlik grantlar tiykarında maqsetli tayarlaw tártibi haqqındaǵı reje óz kúshin joǵaltpaǵan.

Bunı tómendegishe túsindiriw múmkin:

Ózbekstan Respublikasınıń «Normativlik-huqıqıy hújjetler haqqında»ǵı Nızamınıń 46-statyası birinshi bólimine bola «Aldın qabıl etilgen normativlik-huqıqıy hújjetlerge jańa normativlik-huqıqıy hújjet qabıllanǵanı sebepli zárúr ózgerisler hám (yamasa) qosımshalar kirgiziledi jáne aldın qabıl etilgen barlıq normativlik-huqıqıy hújjetler yamasa olardıń bólimleri, eger olar jańa huqıqıy normalarǵa qayshı bolsa yaki bolmasa jańa normativlik-huqıqıy hújjet tiykarında tolıq túrde qamtıp alınǵan yaki ámelde óz huqıqıy áhmiyetin joǵaltqan bolsa, biraq rásmiy túrde óz kúshin joǵaltqan dep tabılmaǵan bolsa, óz kúshin joǵaltqan dep tabılıwı kerek».

Usı tiykarda, búgingi kúnge shekem rejedegi tártipler jańa huqıqıy normalarǵa qayshı emes hám bul rejeni óz kúshin joǵaltqan dep tabıw boyınsha qaǵıyda hesh bir normativlik hújjette názerde tutılmaǵan.

Bunnan málim bolǵanınday, joqarı oqıw orınların mámleketlik grant tiykarında tamamlaǵan pitkeriwshilerdiń úsh jıl jumıs islep beriw minnetlemesi búgingi kúnde de ámel etedi.

Ministrlik barlıq sociallıq tarmaq paydalanıwshılarınan tek ǵana rásmiy dárekler arqalı járiyalanatuǵın xabarlardı tarqatıwdı soraǵan.