ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qaraqalpaqstan xalıq jazıwshısı Allanazar Ábdievtiń 60 jıllıǵına arnalǵan konferenciya bolıp ótti

Ájiniyaz atındaǵı Nókis mámleketlik pedagogikalıq institutında Qaraqalpaqstan xalıq jazıwshısı, filologiya ilimleriniń kandidatı, belgili jurnalist Allanazar Ábdievtiń 60 jıllıǵına arnalǵan ilimiy-teoriyalıq konferenciya bolıp ótti.

Ilajǵa Ózbekstan Jazıwshılar awqamı baslıǵınıń orınbasarı, shayır Ǵayrat Majid, Ózbekstanǵa xızmet kórsetken mádeniyat xızmetkeri, Qaraqalpaqstan xalıq shayırı Rustam Musurman, Qaraqalpaqstan Jazıwshılar awqamınıń baslıǵı, Ózbekstan xalıq jazıwshısı Keńesbay Kárimov, sonday-aq, yubiley iyesiniń kásiplesleri, zamanlas jazıwshı, shayırlar, belgili ilimpazlar, jaqın aǵayin-tuwısqanları, shákirtleri qatnastı.

Allanazar Ábdiev 1963-jıl 26-sentyabrde Taxtakópir rayonınıń «Shaljuwıt» awılında dúnyaǵa kelgen.

1985-1990-jılları Nókis mámleketlik universiteti (házirgi Qaraqalpaq mámleketlik universiteti)niń filologiya fakultetinde oqıdı.

Miynet jolı dawamında Qaraqalpaqstan Respublikası teleradio boyınsha mámleketlik komitetinde redaktor, Nókis mámleketlik universitetinde oqıtıwshı, dekan orınbasarı, «Erkin Qaraqalpaqstan» gazetasında ádebiy xızmetker, Ministrler Keńesinde jetekshi qánige, «Ámiwdárya» jurnalınıń bas redaktorı, Nókis mámleketlik pedagogikalıq institutı aǵa oqıtıwshısı sıyaqlı juwapkerli lawazımlarda miynet etti.

2004-jıldan baslap «Qaraqalpaqstan sportı» gazetasınıń bas redaktorı, sonday-aq, 2020-jıldan Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında oqıtıwshı sıpatında jumıs islemekte.

Onıń qáleminen 100 den aslam gúrriń, 5 povest, 2 roman, kóplegen ilimiy hám publicistikalıq maqalalar dóredi. Altı scenariysi boyınsha «Qaraqalpaqfilm» kinostudiyası tárepinen hújjetli filmler túsirildi. Onıń shıǵarmaları ózbek, qazaq hám rus tillerine awdarılǵan.

Allanazar Ábdiev sheber awdarmashı sıpatında J.Simenon, J.Oruell, R.Stivenson, R.Akutagava, R.Gamzatov, Edgar Po, Alfons Dode, Aziz Nesin, Kikuti Kan, Siga Naoya, Junayd Suavi, Ayzek Azimov, Sayd Ahmad, Ótkir Hashimov hám basqalardıń dóretpelerin ana tilimizge awdardı.

Onıń usınday miynetleri múnásip bahalanıp «Shuhrat» medalı, sonday-aq, Qaraqalpaqstan xalıq jazıwshısı húrmetli ataqları berildi. Sonıń menen birge, «Altın qálem», «Eń ullı, eń áziz», «Ardaqlaw», «Jıl jurnalisti» tańlawlarında laureat boldı.

Konferenciyada sózge shıqqanlar Allanazar Ábdievtiń shıǵarmalarınıń qaraqalpaq hám ózbek ádebiyatındaǵı ornı, tematikalıq ózgeshelikleri haqqında maǵlıwmatlar berdi.

Ilaj sońında Allanazar Ábdiev sózge shıǵıp, barlıq shıǵıp sóylewshilerge hám konferenciyanı joqarı dárejede shólkemlestirgen institut jámáátine minnetdarshılıq bildirip, institut kitapxanası ushın óziniń shıǵarmaların sawǵa etti.

NMPI baspasóz xızmeti.