Aldın xabar bergenimizdey, usı jıldıń 23-may hám 10-iyun kúnleri aralıǵında Rossiya Federaciyasınıń Qazan federal universiteti hám Ájiniyaz atındaǵı Nókis mámleketlik pedagogikalıq institutı arasında dúzilgen birge islesiw shártnaması tiykarında Nókis rayonı aymaǵındaǵı Kerder mádeniyatına tiyisli Haywanqala estelik kompleksinde xalıqaralıq arxeologiyalıq ekspediciya ótkeriliwi belgilengen edi.

Xalıqaralıq kólemde birinshi márte ótkerilip atırǵan bul arxeologiyalıq ekspediciyaǵa qatnasatuǵın Rossiya Federaciyası Tatarstan Respublikası Ilimler Akademiyası A.X.Xalikov atındaǵı Arxeologiya institutınıń direktorı, tariyx ilimleriniń doktorı, professor Ayrat Sitdikov basshılıǵındaǵı ilimpazlar Nókis mámleketlik pedagogikalıq institutı rektorı Bayrambay Otemuratovtıń qabıllawında boldı.

Rossiyalı ilimpazlar menen bolıp ótken sáwbetlesiwde eki tárepleme birge islesiwdiń ámeliy nátiyjeleri dodalanıp, aldaǵı waqıtlarda baylanıslardı bunnan bılay da keńeytiw máseleleri dodalandı.

«Haywanqala» arxeologiyalıq esteliginde ámelge asırılatuǵın xalıqaralıq ekspediciyaǵa ulıwma 120 adam, sonnan 20 sırt elli ilimpazlardıń qatnasıwı jobalastırılǵan.

Búgingi kúnde Tatarstan Respublikası Ilimler Akademiyası A.X.Xalikov atındaǵı Arxeologiya institutı hám Qazan federal universitetinen Elena Vorobeva, Renat Valiev, Anna Kuklina, Shamil Amirov, Lyudmila Ovechkina sıyaqlı ilimpazlar respublikamızǵa kelip, xalıqaralıq ekspediciyada óz jumısların baslap atırǵan bolsa, Rossiya hám Qazaqstannan basqa da birqatar ilimpaz qánigelerdiń qatnasıwı kútilmekte.

«Haywanqala» arxeologiyalıq esteliginde ámelge asırılatuǵın xalıqaralıq ekspediciyadan gózlengen baslı maqset arxeologiyalıq qazıw nátiyjesinde tabılǵan buyımlar hám mádeniy qatlamlar boyınsha xalıqaralıq ilimiy pikirdi qáliplestiriw, sonday-aq, ilimiy juwmaqlar shıǵarıw boyınsha belgilengen jumıslardı orınlawdan ibarat.

Sonıń menen birge, bul jerde kelesi 5 jıl dawamında islenetuǵın arxeologiyalıq qazıw jumısların jobalastırıw baslı maqsetlerdiń biri bolıp tabıladı.

Bunıń ushın institut tárepinen 1 milliard 400 million sumǵa qazıw jumıslarında paydalanılatuǵın arnawlı shatırlar hám 4 milliard sumǵa arxeologiyalıq ásbap-úskeneler satıp alındı.

Toplanǵan materiallar tiykarında ilimiy-izertlew jumısların alıp barıw, olardıń nátiyjelerin keń jámiyetshilikke, sonıń ishinde, xalıqaralıq kólemde járiyalaw, instituttıń Tariyx fakulteti studentleriniń teoriyalıq bilimlerin ámeliyat barısında bekkemlew, sırt ellerdegi joqarı oqıw orınları hám ilimiy orayları menen tıǵız birge islesiwdi jolǵa qoyıw xalıqaralıq ilimiy-arxeologiyalıq ekspediyasınan kútilip atırǵan ámeliy nátiyjeler bolıp esaplanadı.

NMPI baspasóz xızmeti.