Ájiniyaz atındaǵı Nókis mámleketlik pedagogikalıq institutında 2023-2024-oqıw jılı ushın qabıllaw processlerine arnalǵan baspasóz konferenciyası bolıp ótti.

Ilajda institut rektorı Bayrambay Otemuratov ǵalaba xabar quralları wákilleri – jurnalistler hám blogerlerge 2023-2024-oqıw jılı ushın qabıllaw procesindegi áhmiyetli jańalıqlar haqqında maǵlıwmatlar berdi.

Institutta 2023-2024-oqıw jılı ushın qabıllaw procesin joqarı dárejede shólkemlestiriw maqsetinde qabıllaw komissiyasınıń juwaplı xatkeri hám tiyisli aǵzalarınan ibarat komissiya quramı tastıyıqlanǵan bolıp, belgilengen joba tiykarında jumıs alıp barmaqta.

Abiturientler hám olardıń ata-anaları ushın tikkeley baylanısıw, tiyisli jol-jobalar kórsetiw hám sorawlarına juwap beriw maqsetinde instituttıń 6-sanlı oqıw imaratında «Call-center» hám «Másláhát orayı» shólkemlestirildi. Olarǵa qabıllaw boyınsha juwapker qánigeler biriktirilgen bolıp, abiturientlerge tiyisli másláhátler berip kelinbekte.

Jaslardı joqarı bilimlendiriwge qamtıp alıwdı bunnan bılay da keńeytiw maqsetinde usı jıldıń 15-iyun kúni «2023-2024-oqıw jılı ushın mámleketlik joqarı bilimlendiriw mákemelerine oqıwǵa qabıllawdıń mámleketlik buyırtpası parametrleri haqqında»ǵı biyligi qabıl etildi.

Xabarıńız bar, Ózbekstan Respublikası Prezidentiniń 2022-jıl 15-iyundaǵı «Mámleketlik joqarı bilimlendiriw mákemelerine oqıwǵa qabıllaw processlerin shólkemlestiriw haqqında»ǵı qararına muwapıq, 2023-2024-oqıw jılınan baslap mámleketlik joqarı oqıw orınlarına oqıwǵa qabıllawdıń mámleketlik buyırtpası parametrleri tek ǵana mámleketlik grant boyınsha tastıyıqlanadı.

Finanslıq erkinlik berilgen joqarı oqıw orınlarınan tısqarı mámleketlik joqarı oqıw orınlarına tólemli kontrakt tiykarında qabıllaw parametrleri bolsa boysınıwı boyınsha tiyisli ministrlik (mákeme) tárepinen Ekonomika hám qarjı ministrligi jáne Joqarı bilimlendiriw, ilim hám innovaciyalar ministrligi menen kelisilgen halda tastıyıqlanıwı belgilengen.

Usı tiykarda Ájiniyaz atındaǵı Nókis mámleketlik pedagogikalıq institutına 2023-2024-oqıw jılı ushın:

– bakalavriattıń kúndizgi 25 tálim baǵdarına ulıwma 2045 orın, sonnan mámleketlik grant tiykarında 560 hám tólemli kontrakt tiykarında 1485 orın;
– bakalavriattıń sırtqı 9 tálim baǵdarına tólemli kontrakt tiykarında ulıwma 550 orın;
– bakalavriattıń keshki 7 tálim baǵdarına tólemli kontrakt tiykarında ulıwma 350 orın;
– magistratura basqıshında 22 qánigelik ushın ulıwma 111 orın, sonnan mámleketlik grant tiykarında 37 hám tólemli kontrakt tiykarında 74 orın ajıratıldı.

Bıyılǵı qabıllaw procesindegi áhmiyetli jańalıqlar

Bakalavriattıń kúndizgi tálim baǵdarları arasında «60111900 – Mektepke shekemgi hám baslawısh tálimde dene tárbiyası hám sport» tálim baǵdarı jańadan ashıldı. Oǵan ulıwma 30 orın, sonnan 10 mámleketlik grant hám 20 tólemli kontrakt tiykarında orın ajıratıldı.

Ózbekstan Respublikası Prezidentiniń 2022-jıl 21-iyundaǵı «Pedagogikalıq bilimlendiriwdiń sapasın arttırıw hám pedagog kadrlar tayarlaytuǵın joqarı bilimlendiriw mákemeleriniń jumısların bunnan bılay da rawajlandırıw ilajları» haqqındaǵı qararına muwapıq, 2023-2024-oqıw jılı qabıllawınan baslap pedagogikalıq kadrlar tayarlaytuǵın joqarı oqıw orınlarınıń 14 tálim baǵdarı boyınsha sırtqı bilimlendiriw túrine qabıllaw ámelge asırılmaytuǵın boldı. Sonday-aq, usı qarar tiykarında 2023-2024-oqıw jılınan baslap pedagog kadrlar tayarlaytuǵın joqarı oqıw orınlarınıń pedagogika tarawındaǵı tálim baǵdarlarına sırtqı bilimlendiriw túri boyınsha oqıwǵa tek ǵana bilimlendiriw sistemasında pedagogikalıq jumıslarda keminde 5 jıllıq miynet stajına iye bolǵan talabanlar qabıllanatuǵını belgilendi.

2023-2024-oqıw jılı ushın qabıllawda bakalavriattıń keshki tálim baǵdarlarına birinshi márte «60111000 – Geografiya hám ekonomikalıq bilim tiykarları», «60111400 – Ózbek tili hám ádebiyatı» hám «60111500 – Ana tili hám ádebiyatı: qaraqalpaq tili hám ádebiyatı» tálim baǵdarları jańadan qosıldı. Olardıń hár birine tólemli kontrakt tiykarında 50 orınnan ajıratıldı.

Ózbekstan Respublikası Ministrler Kabinetiniń 2022-jıl 19-yanvardaǵı «Shet tillerin úyreniwdi jetilistiriw boyınsha qosımsha ilajlar haqqında»ǵı qararına muwapıq, 2022-2023-oqıw jılı qabıllawınan baslap Ózbekstandaǵı 6 joqarı oqıw ornı, sonıń ishinde, Nókis mámleketlik pedagogikalıq institutınıń shet tilleri boyınsha pedagoglardı tayarlaytuǵın bakalavriat tálim baǵdarlarına kiriw imtixanlarında shet tili páninen tıńlap túsiniw, oqıw, jazıw hám sóylew kompetenciyaların anıqlaw jáne bahalawǵa baǵdarlanǵan kásiplik (dóretiwshilik) imtixan ótkeriliwi belgilengen edi. Usı tiykarda, 2023-2024-oqıw jılı ushın instituttıń «60111800 – Shet tili hám ádebiyatı: inglis tili» tálim baǵdarına qabıllaw kásiplik (dóretiwshilik) imtixan arqalı bolıp ótedi.

Ózbekstan Respublikası Prezidentiniń «Mámleketlik joqarı bilimlendiriw mákemelerine oqıwǵa qabıllaw processlerin shólkemlestiriw haqqında»ǵı qararına muwapıq, 2022-2023-oqıw jılınan baslap mámleketlik joqarı oqıw orınlarında magistraturaǵa qabıllaw bir jılda eki márte – avgust hám yanvar aylarında shólkemlestiriliwi belgilep qoyılǵan edi.

Bunda avgust ayındaǵı qabıllaw – gezektegi oqıw jılı ushın tastıyıqlanǵan mámleketlik grant hám tólemli kontrakt tiykarındaǵı kvotalar ushın ótkerilse, yanvar ayındaǵı qabıllaw – jazda tolmay qalǵan orınlar hám Mámleketlik qabıllaw komissiyası tárepinen tastıyıqlanǵan kontrakt tiykarındaǵı qosımsha kvotalar ushın bolıp ótetuǵınlıǵı belgilengen edi.

2023-2024-oqıw jılı ushın qabıllawda magistratura qánigeliklerine qabıllaw tek ǵana bir márte – jazda bolıp ótedi.

Maǵlıwmat ornında atap ótiw orınlı, Prezident qararına muwapıq, magistraturaǵa qabıllaw abiturienttiń bakalavriat diplom balınıń ortasha kórsetkishi hám shet tilin biliw dárejesi boyınsha tiyisli milliy yamasa xalıqaralıq sertifikat tiykarında ámelge asırılıp, qánigelik páninen imtixan ótkerilmeytuǵınlıǵı engizilgen.

Abiturientlerden hújjet qabıllaw procesi

2023-2024-oqıw jılı ushın joqarı oqıw orınlarınıń bakalavriat tálim baǵdarlarına abiturientlerdi onlayn dizimge alıw usı jıldıń 20-iyun kúninen baslandı.

2023-2024-oqıw jılı ushın maqsetli qabıllaw parametrleri hám qabıllaw parametrleriniń tiller kesimindegi bólistiriliwi Bilimdi bahalaw agentliginiń my.uzbmb.uz saytına jaylastırıldı.

Abiturientler usı sayttıń «Joqarı oqıw orınlarınıń bakalavriatına qabıllaw» bólimi arqalı onlayn túrde dizimnen ótedi.

Bunda abiturientler pánler kompleksi hám izbe-izligi birdey bolǵan besewge shekemgi bakalavriat tálim baǵdarı boyınsha tańlawda qatnasıwı múmkin.

Dizimnen ótiw 20-iyulǵa shekem (20-iyul kúni de) dawam etedi.

Shet tilinen kásiplik (dóretiwshilik) imtixan ótkeriletuǵın bakalavriat tálim baǵdarlarına onlayn dizimnen ótiw bolsa 10-iyulǵa shekem (10-iyul kúni de) ámelge asırıladı.

Belgilengen múddet dawamında abiturientler óz maǵlıwmatların ózgertiwi hám shet tilinen sertifikatqa iye bolsa, sertifikat maǵlıwmatların sistemaǵa kirgiziwi múmkin boladı.

Sonıń menen birge, abiturientler onlayn tárizde Birden-bir mámleketlik xızmetler portalı – my.gov.uz arqalı da joqarı oqıw orınlarına hújjet tapsırıw imkaniyatına iye.

Xabarıńız bar, Prezidenttiń 2019-jıl 14-maydaǵı «Joqarı bilimlendiriw mákemelerine test sınaqları arqalı qabıllaw sistemasın jetilistiriw boyınsha qosımsha ilajlar haqqında»ǵı qararı tiykarında test sınaqları shólkemlestirilip atırǵan oqıw jılınan aldınǵı jıllarda bilimlendiriw mákemelerin pitkergen abiturientlerden test sınaqlarında qatnasıwı ushın bazalıq esaplaw muǵdarınıń yarım esesi muǵdarında tólem óndiriledi.

Bunda tómendegi kategoriyadaǵı abiturientlerden tólem óndirilmeytuǵınlıǵı belgilengen:

– test sınaqları shólkemlestirilip atırǵan jılda bilimlendiriw mákemelerin pitkergen abiturientler;
– mayıplıǵı bolǵan adamlar;
– tolıq mámleketlik támiynattaǵı adamlar («Mehriybanlıq» úyi hám Balalar qalashasınıń pitkeriwshileri);
– «Sociallıq qorǵaw birden-bir reestri» málimleme sistemasında dizimge alınǵan adamlar hám olardıń perzentleri;
– «Jaslar dápteri»ne kirgizilgen jaslar;
– jeńillik tiykarında tikkeley studentlikke usınıs etiletuǵın abiturientler.

Sonıń menen birge, ilaj barısında institutta ekinshi hám onnan keyingi joqarı maǵlıwmat ushın qabıllawdı shólkemlestiriw, kásiplik (dóretiwshilik) imtixanlardıń ádil túrde ótiwin támiyinlew baǵdarında ámelge asırılıp atırǵan jumıslar haqqında tolıq maǵlıwmatlar berildi.

Baspasóz konferenciyasında jurnalistler hám blogerler qabıllaw processleri menen baylanıslı ózlerin qızıqtırǵan sorawlarǵa institut rektorı Bayrambay Otemuratov hám qabıllaw komissiyasınıń juwaplı xatkeri Polatbek Kalxanovlar tárepinen tolıq juwaplar aldı.

Ájiniyaz atındaǵı Nókis mámleketlik pedagogikalıq institutı baspasóz xızmeti.