Xabarıńız bar, respublikamızdıń barlıq joqarı oqıw orınları studentleri arasında ótkerilgen «Universiada-2022» sport jarıslarınıń respublikalıq final basqıshınıń ulıwmalıq juwmaqları boyınsha Qaraqalpaqstan Respublikası saylandı komandası ulıwma komandalıq esapta 3-orındı iyelegen edi.

23-iyun kúni Tashkent qalasında bolıp ótken sıylıqlaw saltanatında respublikamız delegaciyasına 175 million sumlıq sport inventarlarınan ibarat «Prezident sawǵası» taspırılǵan edi.

Búgin, 24-iyun kúni Ájiniyaz atındaǵı Nókis mámleketlik pedagogikalıq institutında «Prezident sawǵası» saltanatlı túrde kútip alındı.

Ilajǵa joqarı oqıw orınlarınıń juwapker wákilleri, sportshı student-jaslar hám olardıń trenerleri, sonday-aq, keń jámiyetshilik hám ǵalaba xabar quralları wákilleri qatnastı.

Ilajda sózge shıqqanlar elimizde jaslardıń sport penen shuǵıllanıwı, olar arasında salamat turmıs tárizin keń túrde engiziw maqsetinde ámelge asırılıp atırǵan jumıslar sportshılarımızdıń dúnya arenalarında mámleketimiz bayraǵın jelbiretip, xalqımızdı ruwxlandırıwǵa ayrıqsha úles qosıp atırǵanın atap ótti.

Maǵlıwmat ornında atap ótiwimiz kerek, bunnan aldın «Universiada-2020» sport jarıslarınıń respublikalıq final basqıshı juwmaqları boyınsha Qaraqalpaqstan Respublikası saylandı komandası ulıwma komandalıq esapta 2-orındı iyelegen hám bul nátiyjege erisiwge úlken úles qosqan Ájiniyaz atındaǵı Nókis mámleketlik pedagogikalıq institutına 80 million sumlıq sport inventarlarınan ibarat «Prezident sawǵası» tapsırılǵan edi.

NMPI baspasóz xızmeti.