Ájiniyaz atındaǵı Nókis mámleketlik pedagogikalıq institutında 2023-2024-oqıw jılı ushın bakalavriattıń ayrıqsha qábilet talap etiletuǵın tálim baǵdarlarına kásiplik (dóretiwshilik) imtixanlar ótkerilmekte.

Búgin, 27-iyul kúni Qaraqalpaqstan Respublikası Joqarǵı Keńesiniń deputatları, tiyisli komitet baslıqları, sonıń menen birge, Qaraqalpaqstan Respublikası Korrupciyaǵa qarsı gúresiw aymaqlıq keńesiniń wákilleri institutta dawam etip atırǵan imtixanlardıń barısı menen tanıstı.

Institutta 24-iyuldan baslap bakalavriattıń muzıkalıq tálim, dene mádeniyatı, sonday-aq, súwretlew óneri hám injenerlik grafikası tálim baǵdarlarına kásiplik (dóretiwshilik) imtixanlar ótkerilip atırǵan bolıp, imtixanlardıń belgilengen talaplar tiykarında ádil hám ashıq-aydın ótiwi jámiyetlik shólkemler, siyasiy partiyalar, ǵalaba xabar quralları, sonıń menen birge, Joqarı bilimlendiriw, ilim hám innovaciyalar ministrliginen biriktirilgen wákiller tárepinen qadaǵalanbaqta. Sonday-aq, bakalavriattıń mektepke shekemgi hám baslawısh tálimde dene tárbiyası hám sport tálim baǵdarında kásiplik (dóretiwshilik) imtixanlar usı jıldıń 29-30-iyul kúnleri ótkeriliwi belgilengen.

Imtixanlar Internet tarmaǵı arqalı ata-analar hám keń jámiyetshilik wákillerine tikkeley alıp kórsetilmekte.

Ata-analar ushın sayalı, salqın jerlerde kútiw orınları, abiturientler ushın másláhát orayı hám medicinalıq járdem kórsetiw punktleri, sonday-aq, basqa da sharayatlar jaratılǵan.

Abiturientlerdiń bilim hám kónlikpelerin bahalaw ushın Ózbekstannıń túrli aymaqlarındaǵı joqarı oqıw orınlarınan tájiriybeli professor-oqıtıwshılar hám qánigeler biriktirilgen.

Ótkerilgen kásiplik (dóretiwshilik) imtixanları tolıǵı menen videojazıwlarǵa alınıp, abiturientlerdiń imtixanlarda toplaǵan nátiyjeleri sol kúnniń ózinde instituttıń rásmiy veb-saytı hám sociallıq tarmaqlardaǵı kanalları arqalı járiyalanbaqta.

Baqlawshılar súwretlew óneri hám injenerlik grafikası, sonday-aq, muzıkalıq tálim baǵdarına ótkerilip atırǵan imtixan processlerine qatnasıp, imtixan barısın kózden ótkerdi.

NMPI baspasóz xızmeti.