Xabarıńız bar, búgin, 1-avgust kúninen baslap Nókis qalasındaǵı 6 orında 2023-2024-oqıw jılı ushın joqarı oqıw orınlarına kiriw test sınaqları baslandı. Bul process aymaqlardaǵı abiturientlerdiń sanına qaray ulıwma Ózbekstan kóleminde 13-avgustqa shekem dawam etiwi belgilengen.

Usı processlerde abiturientler hám olardıń ata-anaları ushın qosımsha qolaylıqlar jaratıw maqsetinde Ájiniyaz atındaǵı Nókis mámleketlik pedagogikalıq institutı wákillerinen ibarat «Volontyorlar toparı» shólkemlestirildi.

Topar aǵzaları Respublikalıq oyın túrleri hám jeńil atlektika boyınsha qánigelestirilgen balalar hám jas óspirimler sport mektebinde ótkerilip atırǵan test sınaqlarına kelgen abiturientler hám olardıń ata-anaları menen sáwbetlesiwler, sociologiyalıq sorawnamalar ótkeredi. Sonday-aq, ata-analar ushın mádeniy ilajlar shólkemlestirip, kútiw orınlarında zárúr sharayatlardı jaratıwǵa járdemlesedi.

Sonıń menen birge, joqarı bilimlendiriw, ilim hám innovaciyalar tarawında ámelge asırılıp atırǵan reformalar, olardıń ámeliy nátiyjeleri haqqında maǵlıwmatlar berip baradı.

NMPI baspasóz xızmeti.