Usı jıldıń 4-12-avgust kúnleri aralıǵında Mongoliyanıń Bayan úlgi qalasında shıǵıs kóshpeli xalıqlarınıń milliy oyınlarınıń biri bolǵan toǵız qumalaq boyınsha Aziya chempionatı bolıp ótpekte.

Chempionatqa dúnyanıń onnan aslam mámleketleri qatarında Ájiniyaz atındaǵı Nókis mámleketlik pedagogikalıq institutı dene tárbiyası kafedrasınıń baslıǵı, professor Asqar Niyazov basshılıǵındaǵı qaraqalpaqstanlı sportshılar da qatnaspaqta.

Oyınnıń respublikamızda keń túrde úgit-násiyatlanıwı, ilimiy jaqtan izertleniwi hám rawajlanıwına úles qosıp kiyatırǵan professor Asqar Niyazov chempionattıń ashılıw saltanatında kókirek belgisi menen sıylıqlandı.

Toǵız qumalaq – shıǵıs kóshpeli xalıqları arasında keńnen tarqalǵan, aqıl-oydı rawajlandırıwǵa baǵdarlaytuǵın oyınlardıń biri. Bul oyın arnawlı taqtayshada eki adam arasında oynaladı. Oyın taqtası – 2 qazan, 18 otaw, 162 qumalaqtan quraladı. Oyın basında hár oyınshıǵa bir qazan, toǵız otawǵa toǵı-toǵızdan salınǵan seksen bir qumalaq beriledi. Bul oyın arqalı jaslardıń, ósip kiyatırǵan áwladlardıń matematikalıq esaplaw qábiletleri jetilisip baradı.

Chempionat juwmaqları haqqında qosımsha maǵlıwmatlar beriledi.

NMPI baspasóz xızmeti.