ÁJINIYAZ ATÍNDAǴÍ NÓKIS MÁMLEKETLIK PEDAGOGIKALÍQ INSTITUTÍ

Qabul 2024

NMPIde professional bilimlendiriw mákemeleri avgust keńesiniń juwmaqlawshı májilisi bolıp ótti

Ájiniyaz atındaǵı Nókis mámleketlik pedagogikalıq institutında respublikamızdaǵı professional bilimlendiriw mákemelerinde «Sapalı bilimlendiriw hám maman qánige – turaqlı ekonomikanıń tiykarı!» súreni tiykarında ótkerilgen dástúriy avgust keńesiniń juwmaqlawshı májilisi bolıp ótti.

Ilajda Joqarı bilimlendiriw, ilim hám innovaciyalar ministri, akademik Ibrohim Abdurahmonovtıń qutlıqlaw sózi oqıp esittirildi. Soń ministrliktiń Qaraqalpaqstan Respublikası aymaqlıq basqarması baslıǵı Nursultan Kayupov sózge shıǵıp, ótken jıllar dawamında mámleketimizde bilimlendiriw tarawında ámelge asırılǵan jumıslar boyınsha maǵlıwmatlar berip, jıynalǵanlardı bayram menen qutlıqladı.

2022-2023-oqıw jılında professional bilimlendiriw mákemelerinde alıp barılǵan jumıslardıń juwmaqları hám 2023-2024-jańa oqıw jılına tayarlıqtı kúsheytiw hám maqsetli keleshek jobaların dúziw máseleleri dodalandı. Professional bilimlendiriw sistemasınıń aldına qoyılǵan wazıypalarınıń orınlanıwın támiyinlew, miynet bazarınıń talaplarına sáykes zamanagóy kadrlar tayarlaw siyasatın dawam ettiriw hám ótken oqıw jılında ámelge asırılǵan jumıslar kólemin ulıwmalastırıw máseleleri kórip shıǵıldı.

Májiliste Ózbekstan Respublikası Joqarı bilimlendiriw, ilim hám innovaciyalar ministrligi qasındaǵı Professional bilimlendiriwdi rawajlandırıw institutı docenti Abdurashit Abliyakulov shıǵıp sóylep, bárshe taraw qánigelerine jaqsı tileklerin bildirdi.

Ilajda Nókis qalasındaǵı 2-sanlı Abu Ali Ibn Sino atındaǵı jámiyetlik salamatlıq texnikumı direktorı Maryash Turımbetova hám basqa da kolledj, texnikum, kásip-óner mektepleri direktorları islengen jumıslar boyınsha prezentaciya isledi.

Bunnan soń jıl dawamında úlgili jumıs alıp barǵan kolledj, texnikum hám kásip-óner mektepleri basshıları hám taraw xızmetkerleri ministrlik tárepinen bahalı sawǵalar menen sıylıqlandı.

Ilaj kórkem óner sheberleriniń atqarıwındaǵı koncert baǵdarlaması menen dawam etti.

Ilajǵa Qaraqalpaqstan Respublikası Ministrler Keńesi baslıǵınıń Jaslar siyasatı, sociallıq rawajlandırıw hám ruwxıy-aǵartıwshılıq isleri boyınsha orınbasarı Bayrambay Otemuratov qatnastı.

Maǵlıwmat ornında atap ótiw kerek, búgingi kúnde jaslardı zamanagóy kásip-ónerlerge úyretiw maqsetinde Qaraqalpaqstan Respublikasında 22 kásip-óner mektebi, 12 kolledj hám 15 texnikum, sonın menen birge, 12 joqarı oqıw ornı hám 5 ilimiy-izertlew institutları jumıs alıp barmaqta.

NMPI baspasóz xızmeti.