Bıyılǵı oqıw jılında eselengen tólemli kontrakt («super-kontrakt») muǵdarın 15-oktyabrge shekem tolıq tólegen abiturientler ushın 10 procentlik shegirme beriledi. Bul haqqında Joqarı bilimlendiriw, ilim hám innovaciyalar ministrliginiń málimleme xızmeti xabar berdi.

Bul shegirme 56,7 balldan kóp toplaǵan, biraq kiriw balına 4,05 ball hám onnan joqarı ball jetpey qalıp, oqıwdan jıǵılǵan abiturientlerge tiyisli. 4 ballǵa shekemgi bolǵan shkaladaǵılar ushın bolsa shegirme qollanılmaydı.

Eselengen tólemli kontrakttiń 4 ballǵa shekemgi bolǵan shkalası tómendegishe:

➖ ótiw balına 1 ballǵa shekem jetpegen abiturientler ushın — bazalıq tólemli kontrakt muǵdarınıń 1,5 esesi;

➖ 1,1 balldan 2 ballǵa shekem — 2 esesi;

➖ 2,1 balldan 3 ballǵa shekem — 2,5 esesi;

➖ 3,1 balldan 4 ballǵa shekem — 3 esesi.

Eger abiturient 56,7 balldan joqarı ball toplaǵan bolsa, biraq ótiw balına 4,05 balldan kóp ball jetpese, Ájiniyaz atındaǵı Nókis mámleketlik pedagogikalıq institutında 2 tálim baǵdarında — shet tili hám ádebiyatı: inglis tili, sonday-aq, biologiya tálim baǵdarlarında bazalıq tólemli kontrakttiń 10 esesin, basqa tálim baǵdarlarında bolsa 8 esesin tóleydi.

Tayarlaǵan: Bekbergen Ádilbaev,

NMPI Fizika-matematika fakultetiniń studenti.