Búgin, 8-sentyabr kúni Ájiniyaz atındaǵı Nókis mámleketlik pedagogikalıq institutınıń kishi májilisler zalında «Diniy ekstremizm hám terrorizm, missionerlik — jámiyet rawajlanıwına qáwip» atamasındaǵı ushırasıw bolıp ótti.

Onda Din isleri boyınsha komitettiń Qaraqalpaqstan Respublikası aymaqlıq basqarması qánigesi X.Ibrayımova, Qaraqalpaqstan Respublikası Ishki isler ministrligi jámiyetlik qáwipsiz xızmeti huqıqbuzarlıqlar profilaktikası basqarması baslıǵınıń orınbasarı, podpolkovnik X.Reyimqulova hám «Qumbız awıl» MPJ hayal-qızlar belsendisi G.Táńirbergenovalar shıǵıp sóylep, studentlerdiń kiyiniw mádeniyatı, erte turmıs qurıwdıń aqıbetleri, sonday-aq, hayal-qızlar arasında ushırasıp atırǵan hár túrli jınayatlardıń kelip shıǵıw sebepleri haqqında maǵlıwmat berdi.

Atap ótiliwinshe, búgingi kúnge shekem Qaraqalpaqstan Respublikası aymaǵında hayal-qızlar menen baylanıslı jınayatlar, sonıń ishinde, aldawshılıq penen baylanıslı jınayatlar kólemi artıp barmaqta.

Sol sebepli, qánigeler student-jaslardı sociallıq tarmaqlardan paydalanǵanda abaylı bolıwǵa hám hár qanday túrdegi jınayattıń qurbanına aylanıp qalmawǵa shaqırdı.

Ushırasıw dawamında studentler ózleriniń qızıqtırǵan sorawlarına juwaplar aldı, olar ushın profilaktikalıq mazmundaǵı videorolik qoyıp berildi.

Bekbergen Ádilbaev,

NMPI Fizika-matematika fakultetiniń studenti.